Main gumpal isi ulih nyadi aktiviti manahka pengerai

LIMBANG: Raban nembiak seruran diperansang nyereta main gumpal isi nyadi aktiviti bepengerai, ku Kaban Kunsil Nengeri (ADUN) Batu Danau Paulus Palu Gumbang.

Ku iya, gelanggang gumpal isi tebilang amat ba Malaysia laban mujur nempa atlit ba renggat nasional, taja pia, pegari nama sukan nya agi ba tikas baruh.

“Nya alai raban nembiak patut diperansang nyereta sukan gumpal isi sereta ngangkatka nama main tu pegari agi,” ku iya rambau Pekit Mr Body Builder dan Mr Wonderful beserimbai enggau Hari Tasik Mas diatur Kaunsil Pelilih Limbang (MDL) eng- gau Kelab Gimnasium Rakyat Limbang ba Dataran Jubli Emas ditu, malam kemari.

Bela datai pengari Residen Bagi Menua Limbang Aspalela Shamuni, Ketuai Kunsil MDL Kaunsilor Sufian Mohat, Sapit Ketuai Kunsil Kausilor Dahlan Dullah enggau Pemangku Sekretari MDL Mohammad Syamil Jumain.

Ku Paulus pekit gumpal isi ukai semina ngayanka gaya enggau gumpal isi tubuh penyereta aja, tang mega dikena ngenang pengawa enggau pengeran nyapai juluk enggau pengawa ngemeranka idup bepengerai.

Iya dekaka pekit ti matak penyereta ari Pulau Borneo tu ulih seruran diatur ninting taun.

Pia mega ku iya, bala komuniti patut ngelimpangka awak aktiviti lumba nyengkaum gumpal isi ari ti masau jam enggau gajet.

Pekit ngelerebut gelar Mr Body Builder enggau Mr Wonderful Tebuka sekali tu ku iya nyapai pemujur pemadu manah pengudah matak 72 penyereta ti datai ari menua Brunei, Limbang, Lawas, Sabah enggau Labuan.

Berebak enggau pengawa nya, Paulus mega bisi ngemendarka geran perintah penyampau RM10,000 ungkup pekit nya.