NRDA udah ngelala produk enggau aktiviti ti dikeandal ulih matak penatai bala pengusung nyengkaum Hari Bukit Mas
LIMBANG: Komiti Mit Dagang Temuai, Rama, Nembiak enggau Main Asal ti ditumbuh di baruh Kaunsil Pemansang Wilayah Utara (NRDA) udah ngelala produk enggau aktiviti dagang temuai besai ngambika dikemansang adap Utara Sarawak.
Kaban Parlimen ( MP) Limbang Hasbi Habibollah madahka komiti nya diketuaika Kaban Kunsil Nengeri (ADUN) Batu Danau Paulus Palu Gumbang udah ngatur randau dikena nyemela, ngelanggur enggau mantaika keretas kereja ba pengawa ngemansangka produk dagang temuai bagi menua tu.
Ku iya, bagi menua Limbang ngembuan produk dagang temuai sida empu ti tau dikemansang kelimpah aktiviti besai ti diatur ninting taun ti ulih matak penatai bala pengusung nyengkaum Hari Bukit Mas.
“Ari pemisi Komiti Mit Dagang Temuai, Rama, Nembiak enggau Main Asal tu, kitai deka bebendar sereta fokus agi ba pemansang dagang temuai ti bisi ba bagi menua tu ngambika diintu sebaka,” ku iya lebuh dirandau pengarang berita ba Hari Bukit Mas ba Taman Tasik Bukit Mas ditu, kemari.
Sama bisi datai ADUN Batu Danau Paulus Palu Gumbang, pengari Residen Bagi Menua Limbang Aspalela Shamuni, Ketuai Kunsil MDL Kaunsilor Sufian Mohat, Sapit Ketuai Kunsil Kausilor Dahlan Dullah enggau Pemangku Sekretari MDL Mohammad Syamil Jumain.
Ku Hasbi, NRDA ti ditumbuh di baruh Kunsil Pemansang Korior Wilayah (RECODA) dikemendarka Perintah Sarawak ngerumban sereta meri fokus ngagai perambu bemacham pekara pemansang.
“Kelimpah ari Komiti Mit Dagang Temuai, Rama, Nembiak enggau Main Asal,
Ari pemisi Komiti Mit Dagang Temuai, Rama, Nembiak enggau Main Asal tu, kitai deka bebendar sereta fokus agi ba pemansang dagang temuai ti bisi ba bagi menua tu ngambika diintu sebaka. Hasbi Habibollah Kaban Parlimen Limbang
empat komiti mit bukai bela ditumbuh di baruh NRDA,” ku iya.
Antara komiti nya iya nya Perengka Guna enggau Infrastruktur (Hasbi), Pengawa Betanam, Betupi, Berikan enggau Akuakultur (Menteri Muda Betanam Betupi Dr Abdul Rahman Ismail), Industri enggau PKS ( MP Lawas Datuk Henry Sum Agong) sereta Pelajar enggau Latih Teknikal (Residen Limbang).
Pia mega ku iya, Hari Bukit Mas ti diatur ninting taun bisi pengulih matak temuai ari menua tu enggau menua luar sereta ulih mansutka penatai pemisi dagang temuai menua ditu.
“Program tu nyadi sebagi ari perambu MDL dikena ngelakuka penyelai Taman Tasik Bukit Mas ngagai bala pengusung ari luar.
“Kelimpah ari Hari Bukit Mas, Pesta Lumpur Bebuak, Pesta Babulang enggau bemacham atur pengawa bukai tau dipasuk dalam Kalinda dagang Temuai Nengeri,” ku iya nerang.
Berebak enggau nya ku iya, sitak Sungai Sentabak di Kampung Patiambun bisi pengulih dikemansang nyadi eko- dagang temuai laban bisi bansa kera belanda, kelip-kelip enggau kandang menua bakau ti nyadi habitat kampung.
Dulu ari nya, Sufian madahka Hari Bukit Mas tau nyadi siti produk dagang temuai chukup nyelai seriris enggau juluk perintah deka ngenegapka ekonomi nengah aktiviti dagang temuai.
“Hari Bukit Mas manggai renggat ke-14 diatur mantaika penyelai ba pengawa matak bala pengusung ari dalam enggau luar menua kelimpah mai kelala Taman Tasik Bukit Mas ti tebilang ba pelilih menua tu,” ku iya.
Kelimpah ngemeranka pekit Mr Wonderful ti disereta penyereta gumpal isi ari wilayah Kepulauan Borneo, lebih 20 aktiviti diatur ngerichahka program sekali tu nyengkaum beberapa aktiviti baru baka pekit batak tali tiga penjuru ngena kain pelikat, pekit kerita, motosikal enggau ensikal ti dilagu, pengerami main asal, pesta ambuyat (linut), petanque enggau aktiviti bukai ba atur program berengkah ari 5 nyentuk 7 Oktober.