Ulah peranak rumah panjai ti pambar ngelubah pemansang
TINJAR: Peranak rumah panjai ba sitak Kunsil Bepilih Nengeri (DUN) Marudi dilalau badu agi pambar laban nya semina deka ngelubahka pejalai pengawa pemansang dia.
Kaban Kunsil Nengeri (ADUN) Marudi, Datu Dr Penguang Manggil madah, sida ti pambar mega ngujungka perintah kelebih agi pengari rayat napi pemar ngagihka bantu enggau bejalaika projek pemansang.
“Lalau aku ngambika semua rumah panjai ba sitak Marudi meri kerejasama rat dikena ngelancharka pemansang ti udah diperambu,” ku iya lebuh bejaku ba program walkabout ba beberapa rumah panjai ngelingi Tinjar, kemari.
Penguang ti mega Menteri Muda Kaunsil Kandang Menua nambah, agih belanja pemansang kelebih agi di baruh Program Transformasyen Menua Pesisir (RTP) enggau Projek Mit Pemansang Menua Pesisir (MRP) deka diagih bela penyampau ngagai semua sitak N76.
Ba atur program walkabout ti diatur belama maya ujung minggu nya, Penguang mega bejadika Gerija Sidang Injil Borneo (SIB) Sungai Nat, Ulu Teru, Tinjar.
Gerija nya digaga ngena gempung belanja ari Unit Pekara Pengarap Bukai (UNIFOR) enggau MRP N76.
Penguang mega bisi bejalai ngabas Rh. Ugak Kalang di Sungai Nat, Ulu Teru, Tinjar lalu ba dia, iya ngemendarka RTP nyeleti jalai tama ngagai Rh Seman beungkus RM106,000 enggau ngaga jematan semin meraka Sungai Nat beungkus RM159,000 ti deka dipejalai ba taun tu.
Dikena nyaup Komiti Pe- mansang Enggau Pengelikun Genturung Pendiau (JKKK) Rh Ugak nyeleti rumah panjai sida, Penguang mega ngemendarka agih belanja MRP penyampau RM15,000 seraya RM3,000 ungkup Biro Indu.
Iya mega bisi ngatur pejalai ngabas Rh Arik China, Sungai Malang sereta ngatur randau begulai enggau bala tuai rumah dia.
Seraya muakka lemai, Penguang bejadika Pekit Main Bol Tebuka diatur Serakup Apai Indai enggau Pengajar (PIBG) Sekula Primari (SK) Lepong Ajai sereta ngemendarka belanja MRP penyampau RM10,000.
Sama bisi datai, bini iya, Datin Monica Ukong Jaya enggau Sekretari Politik Kepala Menteri Alexander Asing Sadai sereya bala tuai rumah enggau ketuai raban bansa Marudi.