Tanda ‘Hivah Joh’ ari komuniti Kayan mujur dipandang ba panggau London
MIRI: Pemanah linggang enggau ayun lundai baka gaya penerebai burung kenyalang ba tisau langit, ngebapka sayap iya enggau lanchar ditunda nyadi siti ari chara mandangka penyelai tanda berintai Hivah Joh komuniti Kayan ti udah dibantai ba Tuke Hall, Regent’s University Inner Circle, London rambau Borneo Hornbill Festival taun nyin tadi.
Tanda pengelama tujuh minit diiring pemanah tiun tebah Sape, ngasuh lebih 400 sida ti datai meda labuh pengerindu kenyau ari keterubah tanda nya dibantai.
Connie Layun Laing ti nguluka raban tanda benama Tingang Madang madahka leka jaku Tingang Madang mai reti ‘kenyalang terebai’ lalu iya mega dipilih nyadi nama raban nya laban kenyalang nyadi lambang besai Sarawak.
“Nya alai kitai nunda gaya kenyalang terebai, kebap sayap sida ti ayun lundai, kaki enggau tubuh mega,” ku iya madah ngagai the Sunday Post lebuh dirandau apin lama ke udah.
Tingang Madang udah ditumbuh kena 13 Mei 2014, pengudah raban sida menang pekit tandai berintai ti diatur Serakup Kayan Sarawak, beserimbai enggau Festival Regata Baram ti diatur ba Marudi ba taun ti sama.
Semua raban tandai berintai bisi lapan iku bansa Orang ulu ari tujuh genturung pendiau ti bebida ba Baram. Sida tu iya nya Connie ari Long Atip, Winnie Luhong Ngo ari Long Panai, Margaret Lahung Mering ari Long Laput, Aren Wan ari Long Bedian, Roslyna Ubung Anyie ari Uma Bawang, Christina Baun Lahang ari Long Tap sereta mega Angela Wan and Do’ Jau ari Long Bemang.
“Bisi mayuh tanda moden kemaya hari ti meri pangka ngagai penyelai tanda asal kitai. Tang menang ba pekit tanda berintai dalam taun 2014 meri peransang ngagai kitai datai begulai sereta ngangkatka tanda ngagai tikas tinggi agi.
“Kesemua kami ngelimpangka mayuh awak matih diri sereta seruran ngansah pengelandik betanda berintai,” ku Connie, seraya nambah, sida nadai napi sebarang penanggul datai belatih begulai laban semua diau ba Miri.
Taja pia ku Connie, bala kaban Tingang Madang udah kala belajarka tanda berintai sebedau tu lalu semua sida udah nguasa pengelandik tanda enggau meruan.
“Udah nyadi pengawa komuniti Kayan, tetiap ruang bilik mesti abis nadai siku nampung pengelandik betanda lalu ulih mantaika tanda berintai enggau landik. Nya alai, semua bala anak udah nguasa iya lalu sida nadai bepenanggul mantaika tanda berintai sebarang maya dipinta,” ku Connie, ti udah nguasa tanda berintai kenyau ari sekula primary.
Kenu ku iya, tanda berintai sepenuju enggau komuniti Orang Ulu sereta begulai enggau muzik Sape. Enti nadai tebah Sape, tanda deka timpang.
Tetiap iku sida ti betanda mesti ngerasuk genap ngepan asal nyengkaum Lavung Se’k ( beaded headgear), Ta’ah (sarong), Bilang Inu (selampai manik), Basung (baju), Leku (gelang kaki enggau jari), Tesa (sementing), Teba’eng Inu (tengak manik), Kirep ( bulu kenyalang) enggau Iseng Sabau (antin).
Kesemua kereban pengias tu beungkus RM2,000 lalu semua isi bulik mesti ngembuan sekeda ari nya enti enda semua.
Dulu kelia ku Connie, tanda berintai suah agi dibantai ba genturung pendiau enggau pasar mit, tang kemaya hari, tanda berintai laku amat dipinta sereta mayuh peminta ba pengerami tauka program ti deka ngaul tanda berindai ba program sida.
Kenyau ari iya ditumbuh, Tingang Madang udah mantaika tanda serata Sarawak lalu tim sida mega kala dikangau ngulu pengerami melah pinang, program diatur opis perintah sereta mega pengerami main asal. Kelimpah ari nya, Tingang Madang mega suah mantaika tanda ungkup pengawa pengasih ba gerija ngelingi mengeri.
Kena 10 September 2016, raban sida udah dikangau betanda ba Pengerami Ngintu Hari Pengada Tuai Pemegai Menua (TYT) Ke-80 lalu sida mega nyadi raban ti betanda ngelalu penatai temuai enggau temuai dipebasa ba pengerami ngirup lemai diatur ba Palan Sivik Miri, ba hari siti.
Ku Connie, diberi awak betanda ba mua TYT nyadi basa besai sereta kenang manis ngagai semua sida seraban.
Kelimpah ari ngatur pemerindang ba luar Miri nyengkaum Brunei enggau Kuala Lumpur, Tingang Madang mega merindang begulai enggau Borneo Sape Master (BSM) maya sida merindang ba London enggau Amsterdam dalam taun siti nyin tadi.
Awak merindang ba London enggau dua endur bukai ba Amsterdam - Malaysia External Trade Development Corporation (Matrade) ba Innbruckweg, Rotterdam and the Church of Our Saviour, The Hague – sereta mega pejalai nemuai budaya ngelawa Paris enggau Brussel, nyadi kenang chukup manis ngagai iya enggau bala kaban krew tanda Tingang Madang.
“Kami meri terima kasih besai ngagai komiti pengatur - Lembaga Baram Sape Master, kelebih agi chairman iya, Datuk Lihan Jok sereta mega penyanding penemu enggau ketuai diligit Temenggung Elizabeth Deng, ti udah ngasuh juluk ati kami deka merindang ba menua tasik nyadi nyata,” ku Connie.
Nerangka awak ti diberi nyadi pekara ti muka mata, Connie ngarapka Tingang Madang deka ulih mantaika tanda sida ngagai mayuh agi endur menua tu enggau antarabansa, ari nya nempa tanda berintai Orang Ulu ba tikas antarabansa.
Taja kiruh nangkup peminta enggau kangau, Tingang Madang nadai kala enda ingatka tuju penumbuh iya, ti deka nyaga penyelai tanda berintai sereta nentuka iya deka ditampung, seruran dibantai dataika jemah.
Ba pekara tu, Connie udah bejalaika inisiatif matih enggau ngembing raban indu enggau barang sapa ti bisi ati belajarka tanda berintai.
“Dulu suba aku udah kala ngatur kelas tanda berintai. Kelas tu diatur belalauka peminta lalu kami agi ngatur kelas ti dipinta. Aku ngarapka rebak nembiak, kelebih agi bala kaban komuniti Kayan enda deka ngelengkaka pengawa asal kitai, laban tu kelai bansa kitai,” ku iya.
Pia mega ku iya, semua penanda Tingang Madang, raban indu ti udah nirika ruang bilik, beumur tuai ari 40 taun.
“Aku pechaya bisi mayuh bala kaban ari rebak nembiak ti ulih ngemai tanda asal tu tang enda mantaika diri laban sida malu, kiruh belajar tauka kereja enggau nadai awak limpang. Aku ngarapka bala apai indai ulih meri sukung ngagai bala anak ari umur biak, ngelala sereta ngenang main asal sida,” ku iya.