Gempung tu bisi penau enggau peneleba ngintu pengelantang rayat kelimpah ngambi pulai hak ke udah lenyau
JULAU: Peranak Sarawak dipinta ngelempaika pengandal sida ngagai Gabungan Parti Sarawak (GPS) ngiring nengeri tu.
GPS bisi penau enggau peneleba ngatur pemansut Sarawak, ngintu pengelantang rayat sereta minta pulai hak di baruh Sempekat Malaysia 1963 (MA63) ti udah lenyau ngelama tu.
GPS, nyadi gempung parti bepelasarka Sarawak, ukai semina meretika penanggul enggau peminta peranak Sarawak aja, tang mega bisi penau enggau peneleba ngiga pemutar dikena mutarka pekara nya, pia ku Kaban Kunsil Nengeri ( ADUN) Meluan, Rolland Duat.
Taja bedau rejista, gempung parti dalam GPS udah netapka tuju enggau juluk deka ngangkatka Sarawak ba penuduk ti patut, ku Rolland rambau Program Gempuru Pemesai Begulai Enggau Rayat ba Rumah Mambang, Nanga Lingah, Lasi semak ditu, Hari Enam tu tadi.
Enda baka mayuh raban ti ngaku diri ulih nangkup peminta peranak Sarawak, GPS udah bisi ‘blueprint’ ti nyata tauka kar pengawa dikena nyapai tuju enggau juluk nya,” ku Rolland madah nyemetak, seraya nambah, rayat tau andal laban GPS bisi rikod pengawa ti nyulut nyadi ketuai bepenau, bepengulih sereta bisi peneleba.
Beambika chunto, GPS udah bejalaika pengawa chukup besai minta pulai baru hak Sarawak di baruh MA63 ti udah lenyau, ku Rolland, seraya nambah, Kepala Menteri udah ngetuaika deligit ngagai London ti ngempung fakta enggau bukti dikena negapka agi kes sida minta pulai hak di baruh MA63.
Kelimpah ari nya, perintah nengeri mega udah ngubah Oil and Mining Ordinance ( OMO) 1958 dikena neritka atur matau pengawa nyerungkai enggau prospek petroleum enggau pengawa ngali tanah ba Sarawak,” ku iya nambah.
Baka nya mega, bisi raban ti ngaku diri gawa negika peminta bansa asal ba isu tanah ti naburka mayuh penerang ba media rama, tang nadai siku ulih meri pemutar ti praktikal.
Perintah nengeri diketuaika gempung parti GPS ba pekara bukai udah nyapai mayuh juluk mutarka isu tanah bansa asal sereta agi gawaka pekara nya, ku Rolland, seraya nambah, isu tanah Hak Adat Bansa Asal (NCR), inisiatif nyukat kelingi di baruh Seksyen 6 enggau 18 Kanun Tanah udah enggau benung dipejalai.
Begulaika pejalai inisiatif sukat kelingi tanah NCR di baruh Seksyen 6 enggau 18 Kanun Tanah ba pengawa bala ketuai bansa Dayak dalam GPS, ku Rolland madah nyemetak, iya nya pejalai pengawa begunaka timpuh laban iya dipejalai nitihka renggat pengawa enggau bisi tatak ba belanja diagih ari perintah besai sebedau tu.
Enda adil ngagai sekeda raban enda arapka pengeran ngintu pengelantang enggau peminta komuniti Dayak, ku Rolland, nampung baru, taja nya pengandal sida deka jampat mutarka semua penanggul, sida ngereja pengawa chara diplomatik ngambika peranak Sarawak enda nyima ngagai pangan diri.
“Nyadi pemesai bansa Dayak, kitai endang keran gawa baka bansa bukai, beratika peminta bansa Dayak,” ku iya nandu.
Nya alai ku iya, pengawa sida ukai semina mantu ngulihka tanah NCR enggau PMPG aja, tang mega mantu nambahka penatai pemisi ari pengawa ngemansangka tanah sida ngagai chara betanam betupi moden enggau dagang besai.
Rolland minta semua bansa Dayak, kelebih agi sida ti lurus ati nyaga pemerat bala komuniti ngambi gawa begulai di baruh payung GPS dikena nentuka pangka besai ari pengawa ditegika sida diatu.
Baka nya nya, GPS endang minta amat sukung ari semua peranak Sarawak minta pulai baru hak di baruh MA63 enggau bayar royalti minyak enggau gis ti sebaka.
Berebak enggau nya, Rolland mega ngemendarka sebagi ari belanja Projek Transformasyen Menua Pesisir (RTP) ungkup taun 2019 enggau 2020 iya ungkup pengawa ngaga jematan beungkus urung RM1 juta ba kandang menua nya.
Iya mega deka nganjung peminta ungkup belanja MARRIS dikena nyeleti jalai sepanjai 3km Jalai Pedanum/ Lingah ngagai raban bekuasa bekaul, ku iya.
Iya mega ngemendarka geran ari belanja Projek Mit Pemansang Menua Pesisir (MRP) penyampau RM20,000 ngagai Komiti Pemansang Enggau Pengelikun Genturung Pendiau (JKKK) Rumah Mambang.