Empat palan ba Selangau digazet dikena ngenduh maya tasah bah

SIBU: Bisi empat palan ngenduh udah digazet ba Selangau ti nyadi menua ditaga suah dituntung penusah bah maya ujung taun.

Kaban Kunsil Nengeri (ADUN) Tamin, Christopher Gira madahka palan ngenduh tu iya nya ba SJKC Tong Ah, balai mayuh guna Selangau, SK Bukit Arip enggau balai Sekuau.

“Bisi mega siti palan ba mua Pasar Selangau,” ku iya madah ngagai The Borneo Post lebuh ditanya pasal pengawa nyendiaka diri napi penusah bah ba Selangau.

Ku Gira, deka bisi diatur sebengkah aum penusah ngenyit pelilih enggau semua ejensi kena 17 Oktober.

Sarawak disadang napi musim pengujan kandang lima bulan, ari November nyentuk March taun baru, berindik ari penatai musim landas/monsun timur laut ba nengeri tu.

Ba lansa bukai, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Dato Sri Fatimah Abdullah madah raban meri bantu bekal pemakai ungkup sida ti tasah bah ba Sarawak udah dikingat ngambika terit agi ba atur pengawa meri bantu bekal ti diambi ari kilang belalauka gerah Opis Pengintu Pengelantang Mensia Mayuh (JKM) Sarawak.

Ku iya, sida patut ngemeranka disiplin tinggi gawaka pangku pengawa sida, enda meri bekal pemakai ti udah abis timpuh.

Fatimah udah nangkan tetiap barang deka diperesa bala pemesai ba mua kilang dikena nentuka pemakai diterima sida enda abis timpuh.

Iya mega madahka JKM mega ngadang sereta sedia mengaktifkan 610 bengkah palan ngenduh penusah bah serata nengeri ti ulih nampung penyampau 203,960 iku.