Penyampau nembiak dierejister ba Palan Agape Sibu nambah
SIBU: Penyampau raban nembiak ke direjister ba Palan Agape Sibu deka manggai urung 10,000 iku dalam kandang lima ngagai 10 taun ti deka datai.
Tukang Wang Persatuan Kanak-kanak Istimewa Sibu Jimmy Sim Song Jin madah, naka ke diatu, penyampau nembiak dia iya nya bisi 6,000 iku.
“Kami pechaya penyampau tu deka nambah abis nadai 10 peratus setaun.
“Enti 10 taun agi dia penyampau nembiak ke direjister tau manggai urung 10,000 iku,” pia ku iya madah maya Hari Diri Sebilik 2018 enggau Jalinan Kasih Usahawan Sosial Bersama Kanak-Kanak Istimewa ba Palan Agape Sibu ditu, ensana.
Program nya dipenyadi Kaban Parlimen Sibu Oscar Ling sereta digulu Sapit Di- rekter (Sokongan Akademik) Politeknik Mukah Iskandar Reduan.
Pekara tu ku Jimmy ngenataika penanggul enda chukup kereban dikena ba palan nya nyengkaum baka pemesai kandang endur.
Iya madah, sida mega deka nambahka mayuh agi raban pengereja pengawa dia kelimpah nyendiaka latih ti chukup.
“Semua tu deka bekenaka puku ti besai laban kitai meseti nyendiaka palan ti likun sereta meri servis ke pemadu manah ngagai bala nembiak,” ku iya madah.
Jimmy madahka naka ke diatu semua penatai belanja belajaika servis palan sida endang bepun pemeri ari mensia mayuh.
“Nya alai, kami minta pengari rayat ditu (Parlimen Sibu) ngenataika pekara ke benung nyadi ditapi kami tu ngagai perintah besai.
“Ngarapka perintah besai enggau perintah nengeri ulih berundingka chara dikena nyaup kami mai pengelantang ngagai nembiak timpang pendiau ba Palan Agape Sibu,” pia ku iya.
Kelimpah, bekenaka belanja ba pekara meri servis enggau nyendiaka kandang endur ti likun, iya mega madah, diatu merambu deka nyaup 10 iku nembiak diberi ‘coclear transplant’.
“Program tu bela bekenaka belanja ti besai iya nya urung RM70,000 siku lalu enti 10 iku belanja dikena iya nya RM700,000.
“Ari nya, saup perintah baik nya tikas perintah besai tauka nengeri, gerempung ukai dikuasa perintah (NGO) enggau mensia mayuh ke bukai endang sigi dianti,” ku iya nerang.