Pekit Bibat Lengan ngerichah Pesta ‘Koboi’ Siniawan 2018
KUCHING: Ba Pesta ‘Koboi’ Siniawan 2018 kena malam Hari Enam tu tadi, Gerempung Bibat Lengan Sarawak (SASA) keterubah iya ngatur Kategori Gusti Lengan Para.
Kategori tu ngemataka Dato Lakok, nyadi champion ditangkan Mohamad Zamry Sapiee enggau lumur tiga Galang Jabai.
Perais ungkup pemenang iya nya champion RM300, lalu RM200 sereta RM100 diberi ngagau lumur dua enggau tiga.
Piak pengatur mega bisi nyuaka perais pengaga ati RM50 ngagai sdda ke bulih lumur empat ngagai lapan.
Berebak enggau nya ba Puller ari Sabah, Joffey Jolly mujur ngempu gelar ‘Mr Siniawan Cowboy’ pengudah nyadi Champion Entara Champion ba Pekit Bibat Lengan nya.
Iya mujur ngalahka Nizar Yusof ari Putrajaya. Joffey ke mega champion ba kategori Lelaki 80 kilogram (kg) Ke baruh, lalu Nizar champion Lelaki 80kg keatas.
Champion ba ketagori diri empu, seduai iya bela nerima perais RM1,000, midul enggau setipikit.
Kategori Lelaki 80kg Keatas ngemataka Jolly Johnson (Sabah) ba penuduk lumur dua, ditangkan Hariz Joseph (Sarawak) enggau keempat Jacklis (Sarawak).
Lumur dua Kategori Lelaki 80kg Ke baruh dipenggi Abdul Razak (Putrajaya), ditangkan Lee Yong Sheng (Melaka), enggau lumur empat Jong Chi Joon (Sarawak).
Sida bela nerima perais RM700, RM500 enggau RM200 disempulang midul enggau setipikit.
Ba Kategori Tebuka Indu , Abigail Kee (Sarawak) mujur ngempu gelar champion lalu nerima perais RM500, midul enggau setipikit.
Abigail deka ngarika Malaysia ba Pekit Bibat Lengan di Turki dalam bulan tu.
Lumur dua dipenggi Intan Marzietah (Putrajaya), ketiga Chong Ai Mie (Sarawak) enggau lumur empat Rebecca Christy (Sarawak).
Sida bela nerima perais M300, RM200 enggau RM100 disempulang midul enggau setipikit.
Pekit tu diatur Gerempung Bibat Lengan Sarawak (SASA).
Sama bisi datai Presiden Gerempung Main Bibat Lengan Malaysia (MyArms) Mohd Zil Fadli, Presiden SASA Matthew Dominic Barin enggau Sapit Presiden MyArms Stephen Kee.