SMK St Teresa deka ngembuan perengka guna meruan sereta digaga siti sesi

KUCHING: Projek ngiga belanja dikena ngentak baru begunan Sekula Sekondari (SMK) St Teresa, ti balat rusak ketegal penusah angus dua taun ke udah, diatu manggai RM4.9 juta penyampau, ngambika bala nembiak enggau pengajar ulih ngasaika perengka guna pelajar ti meruan agi nyengkaum nyadi entiti sekula siti sesi.

Prinsipal SMK St Teresa, Mary John madah ungkus ke amat projek ngentak baru sepenyampau RM8.2 juta dikena ngaga blok begunan empat ringkat ti nyadi opis ngatur pengawa enggau kelas sereta blok Balai Mayuh Guna tiga ringkat, projek ditimpuh berengkah ujung taun tu.

Penusah angus sekula perintah ti beumur 133 taun nya kena 29 Okt, 2016, udah nganguska sebagi ari blok balai sekula, ngujungka balai endur gempuru, bilik petugas, librari, kelas bejait, bengkel kemahiran idup, bilik kaunseling, surau, agu enggau bilik nyelak enda likun dikena.

“Pengusah penusah nya, kami angkat baru enggau jampat. Diatu kami bisi 960 iku nembiak (semua indu) enggau 63 iku pengajar enggau 21 kelas sesi lemai enggau lapan kelas sesi pagi,” ku iya madah ngagai Bernama.

“Kami seruran deka nge- lancharka pengawa ngiga belanja begulai enggau Serakup Old Teresians, Serakup Apai Indai enggau Pengajar (PIBG) SMK St Teresa enggau kaunsil pengatur pengawa sekula. Aku temegah enggau lantang ati meda penyampau RM3.2 juta ti ulih digaga dalam timpuh urung setaun aja,” ku iya nambah.

Mary madahka pojek ngentak baru ti dipelaba tembu ujung taun 2020 deka meda SMK St Teresa nyadi sekula siti sesi, seriris enggau Pelan Induk Pendidikan ti mega meransang kaul sektor peribit nengah aktiviti tanggungpengawa rama korporat.

“Kami ngarapka Perintah Nengeri enggau Perintah Besai nengah Opis Menteri Pelajar deka meri geran sepadan,” ku iya.

Kelimpah ari ulah ‘gerah jari’ orang ngatika diri enggau ex-nembiak sekula nya ti nyuaka pemeri ngagai wang turu nya, iya mega madahka Perintah Nengeri bela nyuaka bantu RM1 juta nyadika belanja ngentak baru sekula, disuaka ex-Kepala Menteri niang Tan Sri Adenan Satem, enggau RM500,000 agi ari penyilih iya, Datuk Patinggi Abang Johari Tun Openg.

Kenu ku iya, PIBG sekula deka ngatur sebengkah pengerami makai lemai enggau rambai jaku “Let’s Re- build St Teresa” kena 16 November tu ba pengawa ngiga belanja ungkup wang turu nya, ti deka diguluAbang Johari.

Mensia mayuh ditesau datai lalu nyuaka pemeri ungkup pengawa pengasih nya enggau meli tikit berega RM150, RM300 enggau RM500 siti ari Kiew Lee Chin, betelefon nuju lumur 019- 8941923 tauka Tan Pek Huang (0168898113). — Bernama