Nyengkaum nerima surat tesau kena 17 Mei 2018 nangguhka dulu pengawa bekaul JKKK enggau JKKKP
KUCHING: Elawin ketuai raban bansa Sarawak dibayar perintah nengeri kenyau ari bulan Mei 2018.
Sapit Kepala Menteri, Datuk Amar Douglas Uggah Embas madahka nya berindik ari surat tesau ari Sapit Ketuai Sekretari Opis Menteri Menua Pesisir enggau Kandang Menua kena 17 Mei 2018, ti nesau nangguhka dulu pengawa bekaul enggau Komiti Pemansang enggau Pengelikun Genturung Pendiau (JKKK) enggau Komiti Pemansang enggau Pengelikun Genturung Pendiau Perintah Besai (JKKKP).
Nitihka dalam surat tu kena 17 Mei 2018 ku Uggah, “Berindik ari pemutus Pengawa Bepilih Besai Ke-14 ti ngujungka ketuai renggat di serata menua berubah ke alai mega bekaul enggau institusyen JKKK sereta JKKKP’.
Ku Uggah dalam surat nya madah, “Beduduk ari pekara nya, kerejasama ari YBhg Dato’/ Tuan/ Puan dipinta nangguhka dulu semua pengawa bekaul enggau JKKK/JKKKP nyengkaum pengawa nyiri, nukar, bayar elawin enggau pekara bukai ti bekaul”.
“Aku deka madah iya nya perintah nengeri nerima surat tesau nya kena 17 Mei lalu berengkah ari hari nya, semua elawin Ketuai Genturung Pendiau JKKK dibayar perintah nengeri.
“Nya alai aku enda nemu dini alai Baru Bian (Menteri Kereja Raya) bulih penerang madahka (perintah besai mayar elawin nya),” ku iya lebuh dikerandau raban pengarang berita.
Dulu ari nya Uggah bejadika International Conference on Agriculture and Agro-based Industry Sarawak 2018 ( ICAAS 2018) enggau ngemataka pengawa
Aku deka madah iya nya perintah nengeri nerima surat tesau nya kena 17 Mei lalu berengkah ari hari nya, semua elawin Ketuai Genturung Pendiau JKKK dibayar perintah nengeri. Datuk Amar Douglas Uggah Embas Sapit Kepala Menteri Sarawak
nyain Sempekat Pemereti Ati (MoU) entara RECODA enggau Agrobank ba Penview Convention Centre (PCC) Demak ditu, kemari.
Bekaul enggau atur nagang ketuai raban bansa ngulu program ke ukai diatur perintah nengeri, ba penemu iya nya ukai dipunka perintah nengeri tang dipejalaika ketegal ulah perintah besai.
Iya madahka nya bepun ari surat tesau tauka pemutus ti digaga perintah besai nengah Opis Menteri Pemansang Menua Pesisir enggau Kandang Menua kena 17 Mei 2018.
“Nya alai aku ngasaika nadai salah perintah nengeri mega malas bekaul enggau pekara JKKK. Aku ngasaika ukai kitai ti ngepunka nya dulu,” ku iya ti mega Menteri Betanam Betupi Moden, Tanah Adat enggau Pemansang Kandang Menua.
Bejaku baru Uggah madahka, baka ke udah disebut Menteri Muda Kaunsil Kandang Menua Datu Dr Penguang Manggil dalam ripot berita The Borneo Post kemari, nya amat.
“Keterubah, Opis Pemadah nadai agi meri servis ngagai kami, suba enti bisi pengerami tauka program sida ulih mantu tang dia tu nadai agi, lalu nuan nemu JASA mega udah dipadamka, pia mega KEMAS, pegawai KEMAS enda ulih dikena kami agi,” ku Uggah.
Isu nya dikerembaika lebuh surat tesau ti pansutka kena 11 Oktober 2018 ari perintah nengeri ti ngaga pemutus enda ngemendarka ketuai raban pupu bansa ngulu pengerami tauka program ti ukai diatur perintah nengeri.
Lalu bepelasarka ripot berita kena 21 Oktober 2018 Menteri Kereja Raya, Baru madahka Perintah Besai Pakatan Harapan (PH) deka ngagihka RM35 juta ba taun 2019 ungkup Sarawak dikena mayar elawin ketuai raban bansa.
Taja pia, Baru madahka elawin nya meseti diberi ngagai ketuai raban bansa ke dipilih rayat lalu ukai ngagai ketuai ti dipilih ketegal pekara politik.
Kelimpah ari nya, Uggah lebuh ditanya bekaul enggau sekeda pengari rayat ari Gabungan Parti Sarawak (GPS) enda ulih ngulu program ke diatur sekula enti nadai minta pemendar ari orang tauka opis ke bekaul, iya madahka bisi sekeda endur nadai penanggul enti YB GPS ngulu program sekula.
“Sekeda endur iya (Yb GPS enda ulih ngulu program sekula). Sida (pengatur) patut minta pemendar dulu.
“Kitai mega mantu sekula laban dia nembiak kitai, kitai deka meri sida peluang sereta berandau enggau sida mega, tang sekeda YB bisi penanggul lebuh deka ngulu program sekula,” ku iya seraya madahka diri nadai udah meda surat tesau bekaul enggau pekara nya.