Pengemeran industri betanam betupi deka disikap ngena teknologi ke pemadu baru
KUCHING: Perintah bebendar deka nyikap pengemeran industri betanam betupi ngena teknologi ke pemadu baru, dikena ngenegapka industri nya ba nengeri tu seraya nempa pemekit baru entara menua ti besemak.
Sapit Kepala Menteri, Datuk Amar Douglas Uggah Embas madah, perintah arap bendar pengemeran industri seruran sedia ngubah paradigma sida ti ngemeran sereta nelebaka diri ngena proses sereta chara baru, moden sereta ngasi agi.
Ku iya, nya beguna amat dikena nentuka Sarawak ulih nyadi palan ti dipilih pemeranak puku enggau ‘venture capitalist’.
“Rambai jaku ke dipilih ungkup dua hari aum besai iya nya ‘Transforming the agriculture Sector Through Smart Farming’, senutuk endar enggau pengeran kitai ke deka ngelakuka pemesai guna pengemeran industri betanam betupi nengeri ngena teknologi moden, lalu bakani teknologi digital dikena mekal asil betanam betupi enggau rentayan ke beguna.
“Aum besai tu diatur enggau tiga objektif besai ti mekuh ngagai bekunsika penemu enggau chara ti pemadu manah dalam industri betanam betupi sereta industri bepelasarka – agro kelimpah ari matau sistem ngenatai ba pengawa betanam betupi ti ngasi.
“Tuju aum tu mega endur ngelala peluang ngena teknologi digital dikena ngangkatka pemansang betanam betupi ti tegap sereta ulih besemekih,” ku iya ti mega Menteri Betanam Betupi Moden, Tanah Adat enggau Pemansang kandang Menua.
Uggah mansutka pekara nya lebuh bejaku seraya bejadika International Conference on Agriculture and Agro-based Industry Sarawak 2018 (ICAAS 2018) ti diatur ba Penview Convention Centre (PCC) ditu, kemari.
Dulu ari nya, iya madahka opis menteri iya begulai enggau ejensi baka Opis Betanam Betupi, Opis Servis Veterinari, SALCRA enggau Kaunsil Pemansang Tanah Sarawak (SLDB)dibkeandal bejalaika pemansang betanam betupi chara komersial ba tanah asal.
Opis menteri iya ku Uggahm bejalaika program transformasyen strategik dikena mansalka agi pemasang sektor betanam betupi nengeri.
“Juluk kitai deka nempa Sarawak nyadi hub betanam betupi ke pemadu besai ba rantau tu seraya ngerapitka agi seraka penatai pemisi entara rayat menua pesisir enggau mengeri.
“Entara program transformasyen betanam betupi ke dipejalaika opis menteri nyengkaum ngemoden enggau mekomersialka betanam betupi sereta ngemeranka teknologi digital dalam sektor tu.
“Chara tu dipejalaika dikena kitai nyapai juluk YAB Kepala Menteri ti deka nyadika Sarawak pengeksport lebuh manggai taun 2030. Lalu ari nya ulih nempa Sarawak nyadi sebuah menua ti maju enggau bepenatai pemisi tinggi lebuh manggai taun 2030,” ku iya.
Aum besai ke diatur dua hari nya dibagi ngagai sesi batang pengawa, bekunsi penemu enggau peneleba ke dibantaika 40 iku pengelicha ari dalam enggau luar nengeri tu sereta pakar industri ti bekunsi penemu pemadu baru enggau bala pengari.
Urung 1,500 iku pengari ari institusyen perintah enggau peribit sereta organisasyen ti ngulu aum besai nya ke diatur Perintah Sarawak nengah Opis Menteri Betanam Betupi Moden, Tanah Adat enggau Pemansang Kandang Menua enggau Opis Betanam Betupi Sarawak sereta disukung Institut Pemansang Sarawak (SDI) enggau ke bukai.
ICAAS 2018 iya nya ke-2 kali udah diatur, ti nyadi siti ari komponen Sarawak Agrofest. Bisi beberapa aktiviti besai deka diatur sekumbang semilan hari nya. Aktiviti pemandang enggau bejual bisinyendiaka 210 palan pemandang dibuka ti meri peluang ngagai orang dagang menua tu, institusyen enggau organisasyen mandangka penemu baru, produk enggau inovasyen.
“Kami bisi nyendiaka ‘khas’ Sarawak Smart Farming Pavilion, ti ngayanka teknologi ke pemadu baru sereta moden ungkup sektor betanam betupi,” ku Uggah.
Sama bisi datai ba pengerami nya Menteri Muda Pemansang Tanah Adat Datuk Roland Sagah; Menteri Muda Betanam Betupi Dr Abdul Rahman, Penyanding Penemu Pengawa Mansik Sains Sarawak Tan Sri Alfred Jabu Numpang enggau ke bukai.