Perintah Sarawak deka mansutka RM11 bilion dikena ngemansangka infrastruktur
KUCHING: PerintahSarawak deka mansutka belanja RM11 bilion dikena ngemansangka infrastruktur baka jalai enggau perengkaguna ba nengeri tu dalam timpuh dua taun deka datai.
Kepala Menteri Datuk Patinggi Abang Johari Tun Openg madahka agih belanja RM11 bilion nya deka dikena ngaga jalai alun, jematan, nyendiaka bekal ai enggau kuasa karan ba serata Sarawak.
Iya madah, ari penyampau nya, RM2.8 bilion diungkupka bekal ai, RM2.3 biliun bekal kuasa karan lalu urung RM6 bilion dikena ngaga jalai besai tebing tasik.
“Kitai enda kala ngena penyampau belanja ngemayuhka nya ungkup infrastruktur lalu tu deka nyadi rikod pekara belanja Sarawak,” ku iya.
Iya mansutka jaku nya lebuh bejaku ba pengawa nutup program ‘retreat’ ungkup bala ketuai opis perintah nengeri ba sebuah hotel ba Batu Feringghi, Pulau Pinang Hari Satu tu tadi.
Abang Johari meri terima kasih ngagai 140 iku pemesai perintah nengeri ti nyereta program nya pengelama tiga hari ba pengawa ngiga chara ngerumban pejalai semua projek ti udah dikemendarka perintah nengeri.
Iya mega ngemendarka ‘belanja pengarap’ sepenyampau RM200 juta dikena nimbal peminta ari perambu ngenyampat enggau nambahka penyampau pemujur projek ti udah dikemendar.
Ku iya, belanja pengarap RM200 juta deka dikena melanja, mayar balik pengudah bajet dikenuku ungkup renggat ngepunka projek nyengkaum pra-pansik enggau pengawa nyerenih.
Ba jaku dipansutka iya, sekali agi iya madahka perintah nengeri udah berunding deka nyendiaka geran enggau nadai madahka penyampau nya ngagai tetiap iku anak mit baru ada ngagai peranak Sarawak berengkah ari taun baru.
Ku iya, duit turu nya semina tau dikeluar pengudah anak mit nya manggai umur 18 taun.
Pekara tu dibantaika iya lebuh bejaku ba atur pengawa Lan Berambeh 2018 di Kuala Lumpur Hari Enam tu tadi.
Seraya rambau atur program ‘retreat’ nya, bala pemesai dibagi ngagai beberapa raban berandau ngambi mantaika langgur penemu ngagai perintah nengeri dikena nentuka pejalai projek ulih dirumban sereta ngenegapka agi servis perintah nyengkaum bantu pengelantang dipelanja perintah nengeri.
Ku Abang Johari, iya udah tetemuka jalai ngulihka mayuh agi asil ungkup Sarawak ti deka dikena melanja projek enggau enda ibuh ngena rizab nengeri ke bisi diatu.
“Anti aja ba jaku aku mantaika bajet kena 5 November tu,” ku iya, nadai madahka mekanisme baka ni asil nengeri deka diulih.
Ku iya, perintah nengeri udah ngaga pemutus deka melanja semua projek ti udah dikemendar laban Sarawak enda ulih bepanggai ba Putrajaya melanja projek mai pemaik ngagai rayat.
Abang Johari madahka pengagaga ati laban bisi tambah ba belanja perintah ditambah enggau polisi konsisten deka ngangkatka ekonomi nengeri dalam timpuh dua taun deka datai.
Pia mega ku iya, Sarawak patut ngena memanah ngentapka baru genturung industri ari China ti dipelaba deka nyadi berindik ari gaya pekara nyangka perang dagang antara China enggau Amerika Syarikat.
Dulu ari nya, bemachan raban mantaika pekara besai sentang pemujur projek sereta mantaika langgur penemu ngagai Kepala Menteri enggau bala Kabinet Nengeri betuaika Sekretari Perintah Nengeri Tan Sri Datuk Amar Mohamad Morshidi Abdul Ghani.
Sama bisi datai, Menteri Bekal Ai enggau Elekterik Menua Pesisir Dato Sri Dr. Stephen Rundi Utom, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah enggau Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah.