Siku laki bebadi nyawa ketegal saru ditimbak bakih iya empu maya ngasu di Lubuk Nubau

KAPIT: Disangka burung, siku lelaki bebadi nyawa ketegal saru ditimbak bakih iya empu maya ngasu ba Lubuk Nabau, Rumah Kaya, Sungai Sut, Balleh, lemai ensana.

Ba penusah ke nyadi pukul 4 lemai nya, niang Edwin Gading, 26, dipadahka mati ba palan penusah ketegal ditimbak kena ba pala.

Ketuai Opis Polis Kapit DSP Freddy Bian madah, suspek, 30, madahka diri enda sengaja nimbak niang.

“Suspek empu datai ngelawa opis polis sepengudah penusah nya nyadi sereta madah iya saru nimbak niang ti mega sida serumah laban nyangka senaya niang baka burung,” pia ku iya maya ditanya, kemari.

Iya madah, sebedau penusah nya nyadi, suspek enggau niang nurun ngasu ngena perau sebedau seduai pambar seninjik datai ba palan penusah.

“Maya ngasu nya suspek nimbak niang lalu kena ba pala.

“Nangkan ke nya, suspek lalu pulai kerumah panjai madah ngagai apai iya penusah nya sepengudah niang ditemu iya kena leka sereta nadai enseput agi,” ku iya madah baru.

Nangkan ke nya, sida ngelawa palan lalu mai niang ngagai Sepital Kapit.

Freddy mega madah, polis udah ngerampas senapang enggau kerubung seterum.

Suspek mega dibai ngagai Opis Polis Kapit dikena mansik kes nya.

“Kes tu deka ditasat nengah Seksyen 304A Kanun Keseksaan ketegal enda bejimat ti ngujungka pemati,” pia ku iya nerang.