SK Sungai Buloh ngarapka mayuh bantu dikena ngemanahka sekula nya
KUCHING: Sekula Primari (SK) Sungai Buloh di Selangau ngandalka mayuh agi belanja deka diagih ngagai sekula nya taja sida dipilih nyadi sebagi ari Tanggungpengawa Rama Korporat (CSR) ari kunteriktor Projek Jalai Besai Pan Borneo, tang sekula nya agi tubah begunaka bantu.
SK Sungai Buloh, Selangau dalam kategori nyadi siti ari sekula repuk ba Sarawak.
Penulung Kanan 1 sekula, Jouny anak Sebli, ti udah ngajar lapan taun pengawa ba sekula ti digaga dalam taun 1957 madah, sekula nya ngandal deka bisi blok sekula baru nyengkaum balai makai, enggau mayuh rumah buding.
“Berindik ari nembiak tama sekula majak nambah ninting taun, kitai begunaka buding baru ungkup bala nembiak. Buding diatu enda tetangkupka penyampau tubuh bala nembiak.
“Tujuh taun ke udah, bala nembiak kitai ba sekula tu semina 70 iku aja, lalu ari penyampau nya, antara 30 ngagai 40 iku diau bemalam ba buding dibida ke diatu, 137 iku, lalu 90 iku ari penyampau nya diau bemalam ba buding. Amat, udah balat repuk,” ku iya lebuh ditanya pasal gaya pengerepuk sekula ti nyengkaum nampung prasekula mega.
Iya mansutka jaku tu pen- gudah pengawa nasih tanah dipenyadika Menteri Kereja Raya, Baru Bian ti dalam pejalai gawa enggau disempulang raban media Kuching ba Jelajah FTRoadpedia ari Telok Melano dataika Miri, pengelama tiga hari berunggu, ngabas semua 11 Works Package Contracts (WPC) dalam pun bulan tu tadi.
SK Sungai Buloh, urung 16km penyauh ari pasar Selangau enggau 90km ari Sibu, bisi enam kelas enggau sebuah pra sekula lalu bisi 10 buah rumah kayu pengajar, bulih bekal ai ari tekat ai bukit enggau ai ujan sereta kuasa karan iya nya ari injin api diidup 24 jam.
Diatu, sida bisi sebuah unit blok makmal komputer, sebuah unit buding enggau sebuah blok balai makai, sebuah blok opis sekula, sebuah blok kelas enggau sebuah agi blok kelas pra sekula.
Taja repuk, bala nembiak tama ngagai sekula tu majak nambah ninting taun laban bala apai indai beratika sekula nya sekula ti manah pengudah sida nyapai 100 peratus pas ba peresa UPSR kenyau ari lima taun ke udah.
“Kitai udah ngelangkar siti program nyapai akademik tinggi ungkup sekula, lalu kita ulih meda pemutus kenyau ari lima ngagai enam taun ke udah, kami mujur nyapai 100 peratus ba peresa UPSR.
“Kesemua kami nyengkaum bala PIBG berasai lantang enggau pemutus tu lalu kami udah beratika baka ni bala pengajar endang bebendar gawa nyapai tu. Ba penemu aku, bala pengajar endang patut diberi perengka guna manah agi dibida utai diulih sida diatu, abis nadai tu meri peransang ngagai sida,” ku iya.
Taja pia, Jouny, raban PIBG SK Sungai Buloh enggau sekula nya empu meri besai terima kasih ngagai bala kunteriktor ti udah bejalaika tanggungpengawa sida nge- manahka sekula nya, Musyati Mudajaya JV, siti ari WPC ungkup Pan Borneo Highway Sarawak (PBHS).
SK Sg Buloh besemak enggau kereja WPC No.8 Jematan Sg Kua ngagai Jematan Sg Arip, iya nya 63.678 km pemanjai, lalu Sg Kua-Sg Buloh di baruh seksyen Selangau.
Di baruh kereja CSR Musyati Mudajaya JV, sida deka ngaga lapan unit rumah pengajar, ngaga parit ngelingi sekula, empat unit rumah agu (diatu sida semina bisi sebuah aja) sereta mega ngemanahka balai makai enggau rumah buding nembiak indu ti deka begunaka belanja urung RM1.5 juta.
Jouny ngarapka Opis Pelajar Sarawak ulih mantu sida mutarka penanggul ampuh bah, beratika sekula nya ba kandang ti suah ampuh bah.
“Kitai udah ngasaika penusah besai dalam taun 2015 lebuh bah besai urung pukul 2.30 pagi, ai niki ngenyit. Kitai mindahka bala nembiak ari buding ngagai balai makai, taja bisi sekeda pengajar enda nemu nyemerai. Kami minta sah raban PIBG ngambi betesau ngagai apai indai ngambi bala anak sida ari sekula pengudah ai bah majak balat nyadi.
“Diatu, enti bah mangka sekula kitai, enggau enti ai niki ngagai tikas punggung, tu pekara teleba diasaika kami, tang penusah besai nuntung dalam taun 2015, ke alai ai niki antara 10 kaki ngagai 12 kaki,” ku iya, ngarapka Opis Pelajar Sarawak deka bejalaika pengawa sebedau musim landas datai.
Ba Pelilih Selangau, sida bisi 22 buah sekula primari enggau sebuah sekula sekondari lalu di baruh WPC, SK Sg Buloh iya nya sekula kedua ti deka dikemanahka raban kunteriktor ari PBHS, pengudah keterubah dipejalaika Lebuhraya Utara Borneo (LBU) ke alai sida mantu ngemanahka SK Kpg Buda, sekula ti labuh ke dalam sungai dalam taun 2015.
SK Kpg Buda udah tembu dikemanah ba ujung taun 2017, iya digaga ngena Industrialized Building System (IBS), taja mar amat dilawa enggau gaya pengangkut semina ari perau aja.
LBU mujur nembuka pengawa ngemanah, ke alai sida ngaga sebuah bilik Sains, bilik pengajar, rumah agu ti ungkus manggai RM2.8 juta.
Baru madahka pengawa ti udah dipejalaika Musyati Mudajaya JV ungkup SK Sungai Buloh chunto manah lalu iya ngarapka ukai semina raban WPC aja bejalaika CSR sida mantu sekula repok, tang raban korporat besai mega.