Ungkup belanja RM50 juta udah dikemendarka Kabinet Sarawak dikena bejalaika projek tu, ku Manyin
SERIAN: Perintah nengeri udah ngemendarka RM50 juta dikena nyendiaka bekal elekterik ngagai 113 buah sekula primari di serata Sarawak.
Menteri Pelajar, Sains enggau Pansik Teknologi, Dato Sri Michael Manyin Jawong madahka ke diatu bisi 371 buah sekula di serata Sarawak agi bepanggai ba injin api dikena ngulihka bekal elektrik.
Ku iya, ari penyampau nya perintah nengeri udah ngelala bagi 113 buah sekula ke ulih disambung ngagai grid besai.
“Berindik ari pekara tu, Kabinet Sarawak ngaga pemutus, 113 buah sekula ti semak enggau grid deka dibekalka ngena bekal eleterik 24 jam nengah SESCo tauka Sarawak Energy Berhad (SEB).
“Ungkup belanja RM50 juta udah dikemendarka Kabinet Sarawak dikena bejalaika projek tu,” ku iya.
Iya mansutka pekara nya lebuh bejaku ba pengerami nyuaka ‘ Anugerah Pelajar Cemerlang’ Renggat Pelilih Serian Ke-22 ba Balai Mensia Mayuh Serian ditu, kemari.
Manyin ti mega Kaban Kunsil Nengeri Tebedu madahka diri udah nulis surat ngagai Menteri Pelajar Malaysia, Dr Mazslee Malik urung tiga bulan ke udah lalu minta projek nya dipesetuju lalu dipejalaika.
“Aku madah ngagai iya, Perintah Nengeri Sarawak nyendiaka belanja dikena nyambung bekal elekterik grid ngagai 113 buah sekula di Sarawak.
“Tang nyentuk ke sehari tu (kemari) aku bedau nerima surat timbal ari iya, nya alai kitai enda ulih bejalaika projek tu.
“Nya alai, sekula tu agi bepanggai ba injin api endur ngulihka bekal elektrik,” ku iya.
Manyin madahka taja pan ungkup belanja udah bisi, perintah nengeri enda ulih bejalaika projek nya laban sekula ari baruh bidang kuasa perintah besai.
“Nya alai kitai agi nganti. Sepengudah sida (perintah besai) madah ‘ya’, kitai deka nyambung sekula tu ngagai grid elektrik). Duit udah bisi, udah dikemendarka Kabinet Sarawak,” ku iya.
Ngenang pekara ti sama, Manyin ngarapka Perintah Sarawak deka ngungkupka belanja ari baruh Bajet Nengeri 2019 ti dipejuaraika kena 5 November tu, maya Aum Kunsil Nengeri (DUN). Belanja nya ku iya, dikena ngemanahka sekeda sekula ti udah tuai sereta repuk ba nengeri tu.
Ku iya taja pan napi mayuh penanggul, iya ngelalau kepala pengajar enggau pengajar ngambika enda nganti kereban ti manah sereta disediaka baru dikena bejalaika tanggungpengawa sida.
Tu laban ku iya, enti sida nganti disediaka semua kereban, tikas penyulut akademik di Sarawak enda ulih diangkatka.
Ku iya, penanggul kurang perengkaguna ba sekula mega diasaika iya maya nyadi pengajar dulu suba.
“Tang kami terus ngajar sereta nguji ngangkatka tikas penyulut nembiak kami enggau nguji meri peransang ngagai sida ngambika nyulut dalam pelajar.
“Enti kitai terus nganti, engka 10 taun ari diatu, sekula enda dikemanahka enggau penyulut akademik nembiak kitai enda ulih diangkatka manah agi,” ku iya.
Berindik ari pekara tu, Kabinet Sarawak ngaga pemutus, 113 buah sekula ti semak enggau grid deka dibekalka ngena bekal eleterik 24 jam nengah SESCo tauka Sarawak Energy Berhad (SEB). Dato Sri Michael Manyin Jawong Menteri Pelajar, Sains enggau Pansik Teknologi