Pelilih Menua Tatau udah bisi gelanggang futsal baru
TATAU: Pemain futsal ba pelilih Tatau diatu deka ulih mandangka pengelandik sida bemain ba gelanggang futsal baru ti udah dipenyadi kena Hari Minggu nyin tadi.
Menteri Muda ba Opis Kepala Menteri (UndangUndang enggau Adat Bumiputera), Datuk John Sikie Tayai udah diberi basa bejadika pengawa nya.
Iya ke mega Kaban Kunsil Nengeri Kakus nya mega lalu diberi basa muka Pekit Futsal Lelaki Tebuka Tatau ti diatur beserimbai enggau pengawa bejadika gelanggang futsal nya.
Ba jaku dipansutka iya, Sikie madahka diri deka beratika gaya status ke diatu projek ti diperambu Opis Menteri Dagang Temuai, Seni, Main Asal, Nembiak enggau Lumba deka ngaga stadium ba pelilih Tatau.
Stadium enggau gelanggang main bol sereta trek lumba udah diperambu deka digaga ba belakang Opis Pengerara Api enggau Penyah Penusah (Bomba) Tatau.
“Ba perengkaguna bukai baka ke dipinta raban nembiak baka gelanggang sepak takraw deka dibai ngagai Opis Pelilih enggau Kaunsil Pemansang Bintulu ngambika ngiga endur ti engkeman.
“Tu nyengkaum peminta ngaga gelanggang bola jaring ke bisi perabung ba pasar lama Tatau ti diempu Saberkas mega deka diperatika,” ku Sikie.
Ngenang pasal pekit futsal, iya udah meri sukung manah ngagai pekit ti deka diatur ninting taun nyadi sebagi ari aktiviti bepengerai ungkup peranak Tatau.
Iya mansutka penemu ba pekit futsal nya nangkanka tu, patut bisi mayuh kategori ngambika mayuh agi penyereta datai ari bala nembiak menua tu, orang besai tuai enggau indu.
Ku Sikie, iya deka melanja trofi ngagai bala pemenang ba ketetiga kategori lalu dikena nentuka mayuh agi penyereta, ku iya, tau diatur maya Festival Tatau taun baru.
Dulu ari nya, Chairman Serakup Anak Tatau (Perantau) Mohd Rizal Julaihi ti mega mandal presiden Saberkas Pampang Kakus sereta chairman pengatur meri terima kasih ngagai Sikie ti udah ngagihka belanja sepenyampau RM150,000 ari baruh Projek Transformasyen Menua Pesisir (RTP) iya, dikena ngaga gelanggang futsal besepiak enggau Balai Lumba enggau Main Tatau ti udah tembu digaga pun bulan Jun 2018.
Rizal mega bisi mantaika pematut ngemanahka perengka guna lumba bukai ti bisi ungkup pengelantang peranak menua nya.
“Aku deka meransang raban nembiak kita ngena memanah semua perengkaguna lumba enggau main tu lalu anang ngerusak sebarang perengkaguna tu,” ku iya nambah.