Semina ketuai komuniti ti enda dichiri nengah chara politik deka dibayar gaji, ku Baru
KUCHING: Tuai rumah ti dichiri nengah politik enda deka bulih 70 peratus ari penatai pemisi sida nengau perintah besai Pakatan Harapan ( PH) berengkah taun baru.
Menteri Kereja Raya, Baru Bian madahka perintah besai sebedau tu udah ngungkupka bajet mayar elawin enggau gaji semua ketuai raban bansa di serata Malaysia nengah Opis Menteri Pemansang Menua Pesisir.
“Ba Sarawak, penyampau semua ke diberi dipadahka manggai 70 peratus ari gaji ke tetiap iku ketuai raban bansa nya.
“Taun baru, perintah besai PH udah setuju deka neruska chara nya di Sarawak taja pan Sarawak ukai nengeri ari baruh perintah PH.
“Sepenyampau RM35 juta udah diungkupka ke tuju nya sereta deka dibantaika ba bajet ke deka datai tu,” ku iya.
Iya ti mega Kaban Parlimen Selangau bebendar madahka bantu bajet ti diungkup sereta diberi ari perintah besai PH ngagai perintah GPS semina ulih dibayar ulih perintah GPS Sarawak ngagai semua ketuai raban bansa ti dichiri peranak genturung pendiau enggau rumah panjai nengah chara demokrasi .
Ketuai raban bansa ba tuai rumah ti enda chiri nengah peranak rumah panjai chara demokrasi tang ngena chara sepiak aja, tauka bepelasarka politik ti dichiri kaban politik YB GPS sereta enda nerima sukung ari peranak rumah panjai nya enda deka bulih 70 peratus ari ungkup belanja ti diagihka perintah besai PH.
Aku deka nerangka ditu, peranak rumah panjai ulih ngaga ripot ngagai opis menteri nyema perintah GPS terus ngena belanja ari perintah besai mayar tuai rumah ti dichiri nengah chara politik, ku iya.