Pampang Indu, Nembiak DAP udah ngerembai ngagai menua pesisir di Serian
KUCHING: Parti Tindakan Demokratik ( DAP) diatu ngerembai ngagai genturung pendiau menua pesisir di Serian berindik ari pengawa numbuhka pampang Indu enggau Nembiak ungkup tujuh genturung pendiau ba kandang menua Koran.
Pengawa ngelancharka pampang tu ba Kampung Koran Empaneg kena malam Hari Lima udah dipenyadika Ketuai Nembiak DAP Sarawak Mordi Bimol, ti diarika pemantu khas iya, Benadict Benter.
Ba jaku iya ti dibacha Benadict, Mordi ngansak bala kaban ari dua pampang nya meri servis pulaika pemaik bala komuniti ba kandang menua nya.
Ku iya nambah, bisi program enggau projek ti manah udah diperambu enggau dikemendarka perintah nengeri enggau perintah besai ti tuju pulaika pemaik rayat.
Mordi, ti mega Kaban Parlimen Mas Gading, mega mantaika pengandal diri ngagai bala kaban parti politik, nadai ngira bida penemu politik, ulih bekerejasama ungkup mensia mayuh, seraya nambah, sebarang inisiatif ti manah udah dilangkar ungkup komuniti patut disukung semua.
Chairman DAP Pampang Serian, Edward Andrew Luwak, ti mega bejaku madahka pengawa numbuhka unit nya nyadi siti ari pengawa dipejalai dikena ngenegapka parti nyendiaka diri napi pengawa bepilih nengeri ke- 12.
Iya madahka tim diketuaika Mordi udah ditumbuh dikena ngempung strategi ti meruan ngelawa kandang menua pesisir Sarawak. Ku iya, pengawa numbuhka tim nya deka dilanchar enda lama agi.
Ngenang pasal pekara rama enggau politik,iya minta rayat anang ingatka bida antara sida sereta bekerejasama pulaika pemaik menua nya enggau peranak dia.
Ku iya, enti sema sida meruan bisi silam enggau begedika pangan diri, tu deka ngasuh sida mar deka bekerejasama ungkup pemaik begulai.
“Kemeran kereja siti tim, ngampun enggau badu ingat sereta nyingkang mansang ke mua,” ku iya.
Edward ngansak bala kaban ari dua sayap nya ngetuaika pengawa ngatur program enggau aktiviti ba kandang menua Koran ti datai ari tujuh buah genturung pendiau baka Sora Sumpung, Sora Mawang, Sora Tebas, Koran Kawang, Koran Plaman, Koran Bari enggau Koran Empaneg.
Tujuh buah genturung pendiau nya bisi 1,500 iku pengundi. Program nya diatur genturung pendiau, Willie Daniel Sohong, udah digulu peranak ke tebal agi datai ari kandang menua Koran sereta mega bala ketuai DAP ari kandang genturung pendiau ngelingi nya.