Apai indai mega patut meri kerejasama nentuka pelajar anak sida di sekula ditampung ba rumah, ku Rosey
MIRI: Apai indai anang semina ngelempaika tanggungpengawa nyeridi anak sida ngagai pengajar aja lalu manah agi sida mesti nentuka pelajar bala anak seruran ditampung datai ba rumah.
Bemacham pengawa udah dipejalai dikena mantu bala nembiak ngulih sereta meretika penemu (education explorer) ari nyadi orang ti semina ngingatka aja pelajar ti diberi ( education follower) dikena nyikap sida nangkup peminta jeman Ke-21, ku Menteri Muda Orang Indu, Ruang Bilik enggau Pemansang Anak Mit Rosey Yunus bejaku maya ‘Anugerah Kecemerlangan Pelajar’ Sekula Sekondari (SMK) Suai, kena Hari Satu tu tadi.
Ngelama tu, kitai ngumbai kaul bala apai indai dalam pekara pelajar anak sida di sekula nyadi baka selama, tang ari pemar enggau ubah dunya kemaya hari, kerejasama nengah sekeda chara patut dipejalai semua komuniti dikena nentuka pemujur bala anak kitai. Nya kebuah pelajar ukai semina ba sekula aja, tang mega ditampung ba rumah. Rosey Yunus Menteri Muda Orang Indu, Ruang Bilik enggau Pemansang Anak Mit
“Ngelama tu, kitai ngumbai kaul bala apai indai dalam pekara pelajar anak sida di sekula nyadi baka selama, tang ari pemar enggau ubah dunya kemaya hari, kerejasama nengah sekeda chara patut dipejalai semua komuniti dikena nentuka pemujur bala anak kitai. Nya kebuah pelajar ukai semina ba sekula aja, tang mega ditampung ba rumah,” ku iya nerang.
Rosey mega ngansak bala pengajar seruran ransing ngemanahka tikas pelajar sereta orientasyen ngajar enggau belajar mesti mansang ke mua tauka berubah ari chara belajar ti ngena pengingat runding aja, ngagai chara belajar ti begunaka penemu berunding.
“Bala pengajar patut sedarka mensia mayuh, kelebih agi apai indai seruran beratika penyapai belalauka standard kualiti ti udah disemaya, nya kebuah lalau beguna amat sereta penyapai nembiak ba sukut akademik aja enda chukup laban pekara pemansang diri empu ba genap iku nembiak patut mega diperati.
“Bala nembiak mesti diper- ansang berunding chara kreatid enggau inovatif, lalu aku ngarapka semua raban, sekali nya apai indai, bala pengajar enggau nembiak mesti bekerejasama nentuka pemujur semua lban nembiak nyadi ketuai kitai dudi hari,” ku iya.