TEGAS udah ngatur Woksyop ‘Rakan Belia TEGAS’ bedau lama
KUCHING: Tabung Ekonomi Gagasan Anak Bumiputera Sarawak (TEGAS) udah ngatur Woksyop ‘Rakan Belia TEGAS’ (RBT) di sebuah hotel ditu, bedau lama ti udah.
Batang tuju ngatur woksyop tu iya nya dikena ngiga raban nembiak ti ulih ngarika komuniti ba tetiap bagi menua di selampur nengeri tu. Pengari ti udah dipilih tu deka mai penerang ti beguna ngagai komuniti di kandang menua sida kelebih agi ungkup raban nembiak.
“Kitai muka jalai ngagai pesereta tu ngerundingka sebarang projek ke ulih digaga sida sekalika nengah chara ngatur program tauka muka palan ti mai pemaik ngagai komuniti kelebih agi ungkup raban nembiak.
“Kelimpah ari nya, TEGAS mega seruran nyukung sereta sedia mantu sida bejalaika tanggungpengawa ke mai pemaik ngagai raban nembiak di nengeri tu kelebih agi ari sukut pengawa dagang,” ku Ketuai Pemesai Operasyen TEGAS Awangku Merali Pengiran Mohamed lebuh bejaku ba pengerami nutup woksyop nya ti udah digaga berengkah ari 18 nyentuk 20 Oktober tu tadi.
48 iku pesereta ari selampur Sarawak udah ngulu woksyop ti dipejalai sepengelama tiga hari berunggu nya.
Surai Anthony Abell udah dipilih nyadi Chairman Komiti Tetinggi SOULS Renggat 2018/2020 lalu Mohd. Fikri Ali dichiri nyadi mandal chairman.
Nangkan ke nya, Sekretari iya nya Isaac Lee Mong Yan lalu Tukang Wang, Mattassan Rohani.
Ungkup Eksko Pengawa Dagang, chalun ti dipilih iya nya Dayangku Khalizawati Awangku Serma enggau Jordan Anthony Lian.
Eksko Komuniti iya nya Spanski Steven, Hannah Maria Lemat, Noel Rumpang Sri, Chua Effie enggau Robert Jeno.
Eksko Pemansang Kapasiti, Farzana Jamhari enggau Royston Valentine.
Lalu pengari ti udah dipilih ungkup Eksko Bagi Menua ti udah dipilih nitihka undi iya nya Katy Adida ti ngarika bagi menua Kuching, Erdy Izwan Sohardi ngarika Sa- marahan, Jawing Chunggat (Serian), Watson Menjang (Sri Aman), Gary Ningkan (Betong), Aliff Omar Yunus ( Sarikei), Alexander Frederick Diglin ( Sibu), Haider Kowel Bete (Kapit), Norazryna Abd. Rahman (Mukah), Ngu Yuh Lung (Bintulu), Mohd Rashid Wahap (Miri) sereta bagi menua Limbang diarika Clement Empaling.