Penerang bekaul elawin KM, KK patut dipadah enggau nenak
KUCHING: Menteri Kerja Raya Baru Bian patut nerang enggau nenak agi pasal meri elawin ngagai ketuai komuniti (KM) enggau ketuai kaum (KK) ba nengeri tu dikena nyeliahka saru penemu.
Temenggong Austin Dimin madahka ketuai komuniti enggau ketuai kaum iya nya dua pekara ti enda sama ke alai ketuai komuniti iya nya penghulu, pemanca enggau penghulu.
Nitihku iya nyema ungkup belanja RM35 juta ti dipadahka iya dikena mayar gaji enggau elawin ketuai komuniti, nya amat disambut enggau manah laban ngelama tu ketuai komuniti semina dibayar perintah nengeri.
“Ketuai komuniti ke ditemu aku iya nya elawin enggau gaji dibayar perintah nengeri ngelama tu sereta enda kala ari perintah besai.
“Lalu ketuai kaum baka ketuai genturung pendiau, tuai rumah enggau kapitan elawin sida ari perintah besai nengah Opis Menteri Pemansang Menya Pesisir enggau Kandang Menua (KKLW) sebedau tu,” ku iya madah ngagai Utusan Borneo ditu, kemari.
Ensanus, Baru dalam siti penerang madahka, perintah besai sebedau tu udah ngungkupka belanja dikena mayar elawin enggau gaji semua ketuai komuniti di serata menua nengah Opis Menteri pemansang Menua Pesisir enggau Kandang Menua.
“Ba Sarawak, penyampau ti diberi dipadahka manggai 70 peratus ari elawin ke tiap individu ketuai masyarakat. Ungkup taun baru, perintah besai PH udah setuju neruska nya (elawin) di Sarawak taja pan Sarawak ukai nengeri di baruh perintah PH.
“Bisi RM35 juta udah diungkupja ke tuju nya sereta deka dibantaika ba bajet ke deka datai,” ku Baru.
Bejaku baru Austin, pengudah jaku tesai dipansutka ari KKLW ti ngetuka dulu pengawa bekaul enggau ketuai kaum enggau komiti pemansang enggau pengelikun genturung pendiau (JKKK), lalu ketuai kaum enda nerima elawin ari perintah besai.
Iya madahka, pengawa mayar elawin nya diambi sereta dipejalaika perintah nengeri ti beratka tanggung pengawa ketuai kaum ba renggat pentadbiran genturung pendiau ke dijaga sida.
Ke patut ku iya, perintah besai enda patut ngetuka enda lama elawin ngagai ketuai kaum enggau JKKK nyengkaum di Sarawak.
“Pekara ti baka tu ba aku enda patut nyadi laban gaya politik enggau sida patut neruska pengawa meri elawin ketuai kaum enggau JKKK,” ku iya.
Kelimpah ari nya penghulu ari Santubong, Penghulu Suhaili Kipli lebuh ditelefon nerangka, sida iya nitihka nama aja pekara ke diasuh perintah nengeri.
Iya ti enda nerangka enggau silik pasal ungkup belanja RM35 juta baka ti dibantaika Baru nya madahka, nya bepanggai ngagai pengelandik pemesai nengeri ngemutuska ila.
“Kitai nyerahka aja ngagai pengelandik pemesai kitai pasal pekara tu sereta nitihka nama aja atur sida,” ku iya nerang enggau pandak.