KKKWKPKK udah nyediaka program baka KAPS enggau OSTPC lalu KPI ti ditetapka perintah Sarawak iya nya 10 peratus setaun
KAPIT: Perintah Nengeri nengah Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit (KKKWKPKK) bebendar deka mutarka kes nembiak betubuh bisi ti tinggi di nengeri tu nengah ‘Program Intervensi Sosial: Kesedaran Dan Advokasi Pendidikan Seksual’ ( KAPS) enggau ‘One Stop Teenagae Pregnancy Committee’ (OSTPC) lalu KPI dikena ngurangka penyampau nembiak betubuh bisi ngagai 10 peratus setaun.
“Kitai chukup irau meda kes nembiak ngampang ti suah nyadi. Sarawak ngerikod nembiak ngampang ti tinggi ba Malaysia kenyau ari taun 2015, ari 6.4 peratus ngagai 9.9 peratus dibida enggau Malaysia, 2.4 peratus ngagai 4.1 peratus.
“KPI Perintah Nengeri kurang 10 peratus setaun. Statistik Opis Pengerai Nengeri Sarawak 2017 (2130 kes), 2016 (2481 kes). Kurang ari 351 kes tauka 14.1 peratus. Taja pia, tiga bagi menua, Sibu nadai berubah, Limbang niki 17.3 peratus seraya Sri Aman niki 56.7 peratus.
“Ba Kapit, Kapit 2017 ngerikot 158 kes (Kapit 74, Belaga 44 enggau Song 10), 2016 232 kes. Bisi kurang 74 kes tauka 31.9 peratus. Ba Sarawak, tebal agi nembiak, bisi 58 peratus ngampang,” ku Pemesai Pengatur Pengawa (Pemansang Rama) Opis Residen Kapit, Belayong Pok.
Belayong mansutka jaku tu lebuh bejadika ‘Program Intervensi Sosial: Kesedaran Dan Advokasi Pendidikan Seksual’ (KAPS) diatur ba Sekula Sekondari ( SMK) Bakun, Sungai Asap, Belaga, apin lama ke udah, ti mega udah digulu bala pengajar enggau nembiak sekula.
Ba jaku dipansutka iya, Belayong madah nengah pansik nembiak pengerai ‘ Global School’ diatur dalam taun 2012 ngaul raban nembiak beumur antara 13 ngagai 17 taun nunjukka 50.4 peratus ari sida ngaku diri kala beleman keterubah iya sebedau manggai umur 14 taun.
Ku iya, seriris enggau konteks diatu nya kebuah pelajar pengerai beleman patut enda agi dikumbai ‘subjek mali’, sekalika ari raban sekula tauka apai indai. Sida patut muka agi runding sereta berandau enggau bala anak, nyengkaum pasal pelajar belajar. Kitai patut ngembing bala nembiak bebasaka diri empu lalu milih bakih ti patut, bekunsika pekara ti sama.
“Enti apai indai nerima pen- emu enggau ulih dipechaya, bala nembiak deka bekunsika randau ba sebarang isu. Bala anak mesti diajar ‘nulak’ pinta ti enda patut ari bala bakih sida. Penemu nya suah meri asil positif.
“Bala nembiak mesti belajar baka ni nyaga diri ba pengawa ti diasai tau mejal sida. Tu beguna amat ngasuh sida sedarka pangka ari ulah sida, lalu deka beratika pilih sida dudi hari. Penanggul nembiak betubuh bisi suah mangka pengerai sida enggau mega anak,” ku Belayong madah nyemetak.
Nya alai ku iya, kitai patut sedarka jurai pasal pengawa beleman ukai baka pengawa meri peransang. Tu ngambika bala nembiak kitai sedar nama penyadi ba tubuh sida, nama jalai ti tau ngerusak tubuh sida enggau orang bukai, sereta baka ni ngemeranka ulah bisi tanggungpengawa maya sida ngaga pemutus bekaul enggau pengawa beleman.
“Apai indai suah ngelaungka randau pasal isu beleman enggau bala anak sida. Sida patut sedar, nyangka pekara tu diperati mai pemalu, tang beguna amat sida muka runding enggau berandauka pengerai pasal pengawa beleman begulai enggau bala anak. Pekara tu ditemu raban Women Aid organization,” ku Belayong.
Tambah mega ku iya, ke amat nadai pekara nyata ti nunjukka pelajar beleman ti komprehensif nambahka aktiviti beleman. Manah amat perintah udah bejalaika modul Pelajar Rama enggau Pengerai Reproduktif ba sekeda sekula. Tang laban program tu agi baru, pangka iya apin ulih diperati tauka dibantai.
Nitih ku penerang ku iya, Program Pengerai Reproduktif ba sekula iya nya penerang bekaul chara nagang pengingin diri ( pre- abstinence) enggau akses ngagai penerang pasal pengelikun baka kontrasepsyen ti bisi tatak antara raban nembiak ba Malaysia. Nya kebuah, enda ngasuh tekenyit enti bisi nambah penyampau tubuh nembiak betubuh bisi kandang beberapa taun dalam komuniti kitai.
Ku Belayong, nyangka ketegal sida nembiak kurang akses enggau penemu kontrasepsyen, ngujungka sida ngereja pengawa nya.
Ku iya, pekara nyata nembiak beleman enggau enda nyaga diri, ngujungka sida betubuh bisi. Tebal agi ari 58 peratus nembiak ti betubuh bisi ba Sarawak mega bedau belaki.
Kitai chukup irau meda kes nembiak ngampang ti suah nyadi. Sarawak ngerikod nembiak ngampang ti tinggi ba Malaysia kenyau ari taun 2015, ari 6.4 peratus ngagai 9.9 peratus dibida enggau Malaysia, 2.4 peratus ngagai 4.1 peratus. Belayong Pok Pemesai Pengatur Pengawa (Pemansang Rama) Opis Residen Kapit