Hari Orang Indu 2018 Renggat Nengeri Sarawak deka diintu nyelai ari ke sebedau tu
KUCHING: Hari Orang Indu 2018 Renggat Nengeri Sarawak deka mantaika penyelai enti dibandingka enggau taun sebedau tu, iya nya mai tiga iku bidan ti dilatih dalam taun 1956.
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madahka sida nyidi raban bidan nya sereta deka meri special recognition nyerumba Hari Orang Indu Renggat Nengeri Sarawak 2018.
“Taun tu bisi nyelai mimit. Kitai deka meri ‘ special recognition’ ngagai bidan ke dilatih dalam taun 1956, maya nya umur sida 16 taun dilatih nyadi bidan udah nya pulai ngagai endur diri lalu meri servis bidan.
“Bisi tiga iku sida ke ulih disidi iya nya dua iku ari Baram enggau siku diau di mengeri Kuching ditu. Laban bisi sekeda nya udah nadai lalu bisi ke agi idup tang udah tuai.
“Kitai deka meri sida (tiga) akun ke ‘special’ laban sida tu indu ti ngembuan semengat deka meri servis amat tepuji, laban dulu suba sepital mimit sereta bala lutur enggau indu misi mega enda mayuh,” ku iya.
Fatimah mansutka pekara nya lebuh dikerandau raban pengarang berita, pengudah nyadi Chairperson Mesyuarat Jwatankuasa Induk Hari Wanita Peringkat Negeri Sarawak 2018, ti diatur ba Wisma Wanita ditu, kemari.
Hari Orang Indu Renggat Nengeri Sarawak 2018 deka diatur kena 3 November ba Penview Convention Centre (PCC), Demak ti deka dipenyadika ulih Kepala Menteri Datuk Patinggi Abang Johari Tun Openg.
Rambai jaku taun tu iya nya Orang Indu enggau Pengerai, dikena meri pengiktirafan ngagai raban, orang sesiku sereta pengereja pengawa ba opis pengerai, gerempung ukai dikuasa perintah (NGO) enggau orang indu ke bisi tanggungpengawa nentuka pengerai orang, ku iya.
Nyerumba pengerami tu, bup betajuk ‘Sarawak Women and Wellness’ deka dipenyadika, ke alai bup nya dichelak dikena ngelai sereta ngaku personaliti orang indu ke meri bantu dalam bidang pengerai ti nyengkaum ke dulu kelia.
“Bup tu deka dipenyadi maya Hari Orang Indu, lalu sekali agi aku deka madahka tu ukai senarai lengkap gerempung pengerai ti meri bantu ari segi pengerai enggau ke mantu ngagai pengelantang rayat kitai. Tu semina sekeda ( ari pemayuh gerempung tauka orang sesiku dalam bidang pengerai),” ku iya.
Bisi enam gelar deka diberi maya pengerami tu iya nya gelar pemadu tinggi Anugerah Datuk Patinggi Laila Taib lalu ditangkan Anugerah Ketua Menteri Kepimpinan Wanita, Anugerah Ketua Menteri penggiat Sosial Wanita, Anugerah Ketua Menteri Usahawan Wanita, Anugerah Pencapaian Khas enggau anugerah Pertubuhan Wanita Cemerlang.
Kelimpah ari nya nyerumba Hari Orang Indu bisi diatur program ‘Fun Walk’ enggau rambai jaku ‘Healthy Family, Healthy Nation’ kena 4 November 2018, ke diatur ba DUN Lama.
Bisi nyempulang Fatimah kemari, Menteri Muda Orang Indu, Ruang Bilik enggau Pemansang Nembiak Mit, Rosey Yunus.