Perintah Nengeri nengah Gabungan Parti Sarawak sigi enda ngelakka sekula di nengeri tu pia aja
KUCHING: Tajapan isu sekula dikuasa Perintah Besai, Perintah Nengeri nengah Gabungan Parti Sarawak (GPS) sigi enda ngelakka sekula di nengeri tu pia aja, ku Menteri Muda Nembiak enggau Lumba Datuk Snowdan Lawan.
Bejaku ba program Merarau Sk St Leo (M), Gayau, Pantu ke diatur kena tengan minggu tu tadi, iya madah pemaik sekula kelebih agi sekula di menua pesisir nyadi pekara ke dikemerat Perintah Nengeri.
Berindik enggau nya ku iya ke mega Kaban Kunsil Nengeri (ADUN) Balai Ringin, Perintah Nengeri deka seruran mantu sekula ditu alai agih belanja diberi ngambi tau dikena ngangkatmanah sekula.
“Kita anang irau, kami ke nyadi pengari rayat ari GPS sigi enda deka ngelakka sekula pia aja.
“Seagi sekula nya didiri di menua Sarawak, pemaik sekula deka nyadi tanggung- pengawa kitai lalu deka diatur enggau manah,” ku iya.
Snowdan ke mega Ketuai Bagi Nembiak Parti Rakyat Sarawak (PRS) nambah, raban ADUN enggau MP bisi diberi agih belanja RM5 juta setaun nengah Program Ubah Menua Pesisir (RTP).
Kelimpah dikena ba program pemansang, agih belanja RTP ku iya tau dikena mantu sekula lalu pekara tu suah diadu kami ke nyadi pengari rayat ditu.
Iya mega nesau bala apai indai nembiak nyengkaum pengajar iya nya Gerempung Pengajar enggau Apai Indai (PIBG) bela besaup ba pengawa ngemansangka sekula.
“Anang ngelakka tanggungpengawa nya ba bala pengajar aja, sida apai indai pan patut mantu sekula nengah pengulih diri,” ku iya.
Ba program merarau nya, iya bisi meri agih belanja RM10,000 ngagai PIBG SK St Leo (M) Gayau.
Kelimpah Program Merarau, pengawa nya mega diatur nyerumba genap 60 taun penumbuh SK St Leo (M) Gayau.
Bela datai Yang Dipertua PIBG Sk St Leo (M) Gawn anak Embam, Koordinator Pengintu Sekula (LPS) Tr Tingga anak Medang, Kepala Pengajar SK St Leo, Mungo anak Entalai.
Seagi sekula nya didiri di menua Sarawak, pemaik sekula deka nyadi tanggungpengawa kitai lalu deka diatur enggau manah. Datuk Snowdan Lawan Menteri Muda Nembiak enggau Lumba