Penyampau tu udah disemaya ba manifesto Pakatan Harapan lalu deka dibantai ba Bajet 2019 kena 2 November 2018
KUCHING: Pakatan Harapan(PH) Sarawak deka nentuka kededua Sabah enggau Sarawak diberi 30 peratus agih belanja ungkup pengawa pemansang nengah Bajet 2019.
Chairman PH Sarawak Chong Chieng Jen madah penyampau 30 peratus nya nitihka semaya ba manifesto PH alai Bajet Menua 2019 deka dibantai kena 2 November 2018 tu.
“Agih belanja 30 peratus ari penyampau semua belanja pengawa pemansang menua nengah bajet tu ungkup Sabah enggau Sarawak lalu nitihka semaya ba manifesto PH.
“Nambahka nya, 30 peratus mega nyadi agih belanja ke pemadu besai enti dibandingka enggau bajet ke udah ba jeman perintah Barisan Nasional(BN) pengelama 55 taun,” ku Chong.
Iya ke mega Sapit Menteri Dagang Dalam Menua enggau Pekara Bebeli Barang(KPDNKK) mansutka jaku nya ba aum pengarang berita di Indu Opis DAP ditu, kemari.
Nitihka penerang Chairman DAP Sarawak nya, ba jeman BN, Sabah enggau Sarawak semina diberi 10 nyentuk ngagai 13 peratus aja.
Enti dichampur kededua agih belanja nya( Sarawak enggau Sabah) ku Chong, penyampau enda manggai 25 peratus ari bajet pengawa pemansang menua.
Ba sentang formula bekunsi penatai pemisi ke diperambu PH, iya nya 20 peratus royalti minyak enggau 50 peratus ari asil chukai diberi ngagai Sarawak, Chong madah formula nya udah enda diterima Perintah Nengeri.
Berindik enggau nya Perintah Besai PH lalu numbuhka Komiti ‘Pemandu’ ke diarika lapan pengari ari Semenanjung Malaysia enggau lapan pengari ari Sabah enggau Sarawak.
Enti Komiti ‘ Pemandu’ mengkang bedau nempa formula ke baru ba atur bekungsi penatai pemisi, Sarawak deka nerima 5 peratus bayar royalti minyak enggau gis sereta nerima agih belanja pemansang ke lebih besai.
Nambahka nya, 30 peratus mega nyadi agih belanja ke pemadu besai enti dibandingka enggau bajet ke udah ba jeman perintah Barisan Nasional (BN) pengelama 55 taun. Chong Chieng Jen Chairman PH Sarawak