Lagu ‘Lelengau Ke Nuan’ champion Anugerah Carta Sapa Juara Ke-5

BETONG: Lagu ‘Lelengau Ke Nuan’ ditengkebang Jesley Jabu enggau Mathius Mambang disadaka Karen Libau dipadu menggi gelar champion Anugerah Carta Sapa Juara (ACSJ) ke-5 lalu pulai ngemai perais mata duit RM10,000 disempulang trofi ba renggat kepenudi ti diatur ba Balai Lumba Tan Sri Datuk Amar Stephen Kalong Ningkan Betong semak ditu, malam kemari.

Seraya lagu Sampi ditengkebang penyanyi nya empu, Mattheus Akun Balang menggi lumur dua nerima perais mata duit RM8,000 enggau trofi sereta lagu Lepaska Aku Pegi asil seni Gina Patrick disada Fereny Minea bulih lumur tiga bela nerima perais mata duit RM5,000 enggau trofi rambau atur program datai ba renggat kelima diatur Radio Televisyen Malaysia(RTM) di baruh kelolaan pengacara siaran WAI FM, Monica Midi enggau Bana Jimbat.

Anugerah Vokal Terbaik diberi ngagai Eisner Nala nengah lagu Jalai Pengerindu Tua nerima RM3,000 enggau trofi.

Persembahan Terbaik dipenggi Mark Benet ti nyadaka lagu Asal Jadi mega nerima RM2,000 enggau trofi.

Bela diberi kelala sekali tu iya nya Lirik Terbaik diberi ngagai lagu Lanting Menua asil seni disada Alvin Michael ti nerima RM500 enggau trofi.

Berebak enggau nya, se- mua finalis bela nerima trofi sida enggau bela penyampau RM1,200 ungkup solo enggau RM5,000 beraban.

Sepenyampau 11 finalis udah ngambi bagi nyeng- kaum lagu disadaka artis Linda (Dirantai pengerindu), Louis Bennet ( Martina), Joyce Menti ti bepadu nyawa enggau Joseph Dresa (Pangan Antara Menua), Rickie Andrewson (Penyayau Enda Lela) enggau Kunatak Band (Ngejang Pegi).

Kaban Kunsil Nengeri (ADUN) Layar, Gerald Rentap Jabu datai meda pekit enggtau bejadika program ngarika Sapit Kepala Menteri, Datuk Amar Douglas Uggah Embas lalu nyuaka perais ngagai bala pemekit.

Sama bisi datai ADUN Saribas, Mohamad Razi Sitam, Residen Bagi Menua Betong, Friday Belik, Sekretari Politik kepala Menteri, Dr Richard Rapu, Direktor Pusat Siaran dan Kawalan Rangkaian dan Siaran Multi Channel, Jamil Seman ngarika Ketuai Direktor Penyiaran Malaysia sereta bala ketuai opis bukai.

ACSJ KE-5 : Karen (empat kanan) ngangkatka trofi ti dimenang iya pengudah dipilih nyadi champion ACSJ Ke-5 malam ensana. Bela bisi dipeda Rentap (lima kanan) enggau bala penyereta enggau temuai bukai.

NANKA PENYERAKUP: Chukpai (bediri lima kiba) begambar bebala mayuh enggau kaban PKKS enggau PLKS sereta penerima insentif.