Nadai orang bukai ulih nyaga Sarawak kelimpah GPS
MARUDI: Peranak Marudi udah diterang Perintah Besai berubah pengudah Pengawa Bepilih Besai Ke-14 (PRU14) tang ba Sarawak agi di baruh pegai Perintah Gabungan Parti Sarawak (GPS).
“Nya kebuah, kitai minta peranak Sarawak begempung lalu patut nyaga kuasa enggau pekara ti diempu Sarawak laban nadai orang bukai ulih nyaga kitai (Sarawak) kelimpah ari perintah GPS.
“Seriris enggau nya, bala kaban PBB ngansak bala ketuai meri penerang enggau ngenataika pesan ngagai bala komuniti bukai baka bansa Melayu enggau China ditu, kitai mesti nyingkang nuju pemansang dudi hari,” ku Kaban Kunsil Nengeri (ADUN) Marudi, Datu Dr Penguang Manggil.
Ku Penguang, baka pemansang baru ke alai belanja penyampau RM23 juta projek Tebing Sungai Marudi enggau RM 90 juta ungkup Jematan Batang Baram ti meraka Sungai Baram ba Feri Nanga Ridan udah dikemendarka Perintah Nengeri, ti deka ditinda ujung taun tu. Surat enggau stuktur perambu Jematan Batang Baram udah digaga Opis Kereja Raya (JKR).
Projek ngaga Riverwall udah berengkah dipejalaika Perintah Nengeri nengah JKR enggau belanja penyampau RM3.7 juta. Taja semaya madah sebedau PRU, Riverwall udah dikemendar lebih ari RM9.36 juta ari DID tang naka diatu, agih belanja ari DID udah dikinsil.
Datu Dr Penguang ti mega Menteri Muda Kaunsil Kandang Menua mansutka jaku tu lebuh bejadi nutup Program Karnival Lumba Rayat Bagi Menua Marudi diatur begy- lai Raban Nembiak enggau Indu PBB N.76 Marudi ba Marudi Town Square ditu, pagi kemari.
Ku Penguang, perambu Regata Baram ti ditimpuh taun baru (2019) laban kitai beratika semua projek ti ngaul Tebing Sungai enggau bisi penanggul mimit, kitai deka berati, taja kitai udah bisi belanja ungkup Regata Baram.
Penguang mega minta bala pengari rayat bukai ti semina nemu mejah pengawa bala pengari GPS, lebuh minta sida mantu sekula tang sida nimbal madahka diri nadai belanja.
“Nya kebuah anang kelalu bejaku mejah pengawa orang laban aku udah ngagihka belanja ngagai sekula, pengelama dua taun ke udah, lebih ari RM2.2 juta ungkup sekula primari enggau sekondari,” ku Penguang.