Chukpai: Komuniti Kenyah patut ngenanka penyerakup

KUCHING: Kaban Kunsil Nengeri( ADUN) Murum Chukpai Ugon ngelalau komuniti Kenyah di nengeri tu seruran ngenanka penyerakup.

Bejaku ba pengerami makai lemai ke diatur Gerempung Kenyah Sarawak( PKKS) nengah kerejasama Gerempung Peng Leto Kenyah Sarawak(PLKS) malam ensanus, iya mega ngelalau komuniti Kenyah ngadu kerejasama enggau komuniti bukai nyengkaum perintah.

Angkunka pekara nya, iya muji PKKS sereta PLKS ketegal ti udah ngadu pengawa ti tau mantu ngenegap penyerakup entara komuniti.

“Aku nemu PKKS keran deka nyadi sebengkah gerempung ke dipebasa manggai ba taun 2030. Dikena nyaai juluk nya, kitai meseti ngangkatka modal mensia( komuniti),” ku Chukpai.

Ba pengerami nya mega, iya bisi nyuaka insentif pelajar ngagai nembiak Kenyah ke nyulut ba pengawa sekula alai iya gaga diak ba taun tu penyampau nembiak ke nerima udah nambah.

“Kededua PKKS enggau PLKS madah ngagai aku diak penerima insentif bisi nambah ba taun tu.

“Ungkup komuniti, tu siti berita ke manah alai nembiak tu mih ti deka ngarika komuniti jemah ila,” ku iya.

Nitihka penerang Chairperson PLKS pampang Kuching, Catherina Tipong Usang, insentif ke diberi nya mungkur mata duit enggau setipikit.

PKKS enggau PLKS udah nyuaka insentif nya ngagai nembiak Kenyah kenyau ari taun 2007.

Chukpai ba pengerami nya bisi meri PKKS pampang Kuching geran nengah projek mit menua pesisir (MRP) penyampau RM10,000.

Bela datai ngulu pengerami Chairman PKKS pampang Kuching Lucas Kallang Laeng.