Penatai pemisi 2,630 orang berikan diintu manah nengah ‘Exit Policy’
BINTULU: Opis Berikan Malaysia deka meri pilih pemadu manah ngagai 2,630 iku raban berikan pukat tunda serata menua nyengkaum ba Sarawak ba pengawa bejalaila ‘Exit Policy’ dikena ngintu penatai pemisi orang berikan ba menua tu.
Ketuai Direktor Opis Berikan Malaysia Datuk Munir Mohd Nawawi madahka ba menua tu, pukat tunda ti ngena pemesai mata enggau pemisit 38 milimeter (mm) ti suah dikena ngulihka udang mit ti ulih ngulihka semua nyengkaum ikan mit.
Ketegal pemisit tau ngerusak pemansut, ku iya, sida deka bejalaika ‘exit policy’ pukat tunda Zon C iya nya Zon B ditulak ngagai Zon C penyauh 12 batu nautika pansut ari kandang tebing tasih berindik ari kandang tasik kelebih agi ba tebing tasik 12 batu nautika nyadi kandang produktif ikan betelu.
“Uji perati kandang tebing tasik tu enti sema dikemendar pengawa nunda ikan ti ngujungka pemansut berikan kitai dudi hari deka kurang.
“Kitai enda ngenggaika bisi orang luar (raban berikan menua luar) tama enda beradat tang kitai naka ulih nagang bot raban berikan menua luar ari tama enda beradat sereta nunda pukat sida ba tebing tasik menua tu,” ku iya lebuh nyaut tanya raban berikan rambau atur randau begulai enggau komuniti berikan Bintulu nyengkaum Kuala Tatau enggau Kuala Nyalau nyerumba Program Community Policing Pasukan Polis Marin (PPM) enggau Opis Berikan Malaysia di Markas PPM Wilayah 5 Bintulu di Jepak kena Hari Empat tu tadi.
Ku iya, pukat tunda nyadi kereban ti enda manahka pemansut nyauka baka lipan ti dikena numbangka semua kayu kampung lalu ba tasik, pukat tunda ngeluska semua utai idup nadai ngira ikan mit, besai enggau batu karang.
Nya alai ku iya, sekeda menua nagang pengawa bekenaka pukat tunda tu ba pengawa ngurang bekenaka iya lalu dikena ngemendar tauka nginsil, kitai bejalaika program exit policy pukat tunda zon B dalam taun 2016 tang patut begunaka timpuh ti chukup dikena raban berikan dataika ditangguh ngagai taun 2020.
“Berebak enggau nya, ungkup raban berikan dalam zon nya, kitai benung beratika kereban sama enggau pukat tunda ti meri asil sama tang enda ngerusak pemansut,” ku iya nerang seraya nambah, enti sema raban berikan enggai nukar kereban nya sereta meruna ba endur ti sama zon B, ke alai sida mesti nukar kereban berikan.
Ku iya, raban berikan patut nukar sekalika ngagai ginti, pukat anyut enggau ke bukai, tang nyangka penatai pemisi deka kurang dibida bekenaka pukat tunda ke bisi ti ulih mansutka asil manggai RM20,000 tauka RM30,000 sebulan.
Alternatif bukai ku iya, raban berikan patut ngalih ngagai Zon C, ngena bot besai agi, nukar kereban enggau ke bukai tang enti sema milih beretan ba zon ti sama, kitai benung beratika pukat ti engkeman dikena tang meri asil ti sama.
“Aku pechaya, pengawa nangguhka renggat keterubah enggau kedua polisi hya deka meri pemereti ati ngagai semua raban serata menua kelebih agi ngagai 2,630 iku raban berikan pukat tunda ti ngaul diri ba zon B bekaul enggau exit policy nyadika pilih pemadu manah sida,” ku iya.
Ngelansa pasal pengawa bekenaka motor tauka injin dikena ngulihka pemansut enggau chara nunda, matak enggau ngasur, tebal agi raban berika asal mega bekenaka perau enggau pukat anyut ku iya, ari sukut polisi tauka atur pengawa ti ditetap ba pekara lisin bekenaka kereban, ngagai raban berikan empu patut mereti enggau sedarka pekara senentang penerang sereta nitihka atur pekara lisin ti ditetap.
Ku iya, tuju ngelangkar polisi tauka atur tauka penetap enda ulih ngena kereban injin baka nunda dikena ngurangka penanggul raban berikan kelebih raban berikan mit tauka raban berikan asal ti napi penanggul ba asil nyengkaum nyaga pemansut berikan ti bisi.
Ku iya, raban sida deka nguji ngemanahka sistem ngenatai dikena mantu raban diselinting ngambika ulih ngemuntang sereta nyeliah sebarang isu lalu deka berundingka siti pekara ti manah.
“Pekara ti dipinta raban serakup pukat tunda Sarawak dikena ngemuntang enggau ngelempungka tating atur pejalai ngemaru lisin ngambika tau dikemaru ba wilayah satu dua enggau ke bukai, aku deka beratika atur pejalai ti dipejalai, nyerenih enggau mansik silik pekara nya sereta berunding memanah ngambika atur pejalai ngemaruka lisin ulih dipejalai ba wilayah bukai,” ku iya nerang.
“Aku deka minta direktor pengawa berikan Sarawak mansik pekara tu lalu udah nya, meri langgur penemu atur enggau pejalai ti tau dikena kitai ngemuntangka pengawa enggau nadai nejuka peminta enggau polisi sereta nyaga pemerat semua raban ngambika nadai awak orang memanipulasi sereta mutarka karenah birokrasi,” ku iya nambah.
Sentang pekara nya ku iya, ninting Hari Tiga ninting minggu kitai deka ngatur hari nerima penatai mensia mayuh lalu semua pemesai patut bisi ba opis ngambika mantu ngemuntang sebarang chara bekaul sekalika ba pekara lisi, pemansang, pengawa numbuhka komuniti enggau ke bukai.