Pengawa nyingkang nuju Revolusyen Industri Ke-4 begunaka pengelandik
LONG SAN, Baram: Meretika kebuah nemban nurun besekula, nempa enggau ngetanka sistem sukung ti tegap enggau netapka juluk idup – tu antara tiga pekara ti nyadika lalau pemujur ti patut dikemeran bala nembiak sekula kemaya hari ba pengawa nampung pelajar sida.
Ba pekara tu, Kaban Kunsil Nengeri ( ADUN) Telang Usan, Dennis Ngau madah ari pengawa nyingkang nuju Revolusyen Industri Ke-4, majak beguna ngagai bala nembiak beratika kualiti sida, berundingka tuju sida ba pengidup enggau netapka juluk ti deka dijapai sereta ngena memanah penau sida nentu teulihka idup ti menyana dudi hari.
“Bala nembiak mesti meretika kebuah sida nurun besekula laban enti enda, sida deka enda ulih ngemansangka disiplin diri ti tinggi lalu udah nya deka ngembing sida nadai entu bisi ati ransing nampung pelajar.
“Sida patut beratika pelajar nyadi pekara beguna amat ungkup semina ungkup pengidup dudi hari, tang mega kaling sida enggau komuniti, enda ibuh diansak nurun sekula,” ku Dennis lebuh bejaku bejadika Anugerah Penyulut Nembiak enggau Pengerami Graduasyen Sekula Sekondari (SMK Temenggong Datuk Lawai Jau) Ke-33 ditu, kemari.
Dennis nyemetak madah genap iku ti bisi ati deka nyulut deka napi mayuh pemar. Nya alai ku iya, enti sida enggai napi penekul nya kediri, mar amat sida deka nyapai pemujur.
“Kita patut nempa sistem sukung diri empu. Uji nempa kaul bebakih enggau sida ti deka belajar enggau kita. Anang bebakih enggau orang ti ngelusu tauka sida ti deka mai kitai ngereja ulah enda menuku.
“Ambi sukung ari bala bakih lalu ngaul diri semak enggau bala pengajar kita laban peneguhka kaul enggau pengajar, aku pechaya tu siti jalai kita ulih mujur ba pelajar,” ku Dennis.
Dennis nyemetak madahka bala nembiak mesti mega ngelala juluk idup sida ari umur biak.
“Tentu mega kita mesti nembuka pelajar abis nadai bulih degree keterubah. Tang seruran nguji manggaika juluk kita tinggi agi sereta bulih pemujur.
“Nadai guna nurun beseku- la enggau napi pemar maya belaja enti sema kita nadai tuju idup. Genap iku sida ti mujur bisi juluk enggau tagit sida empu,” ku iya, seraya meransang bala nembiak ti deka bulih penyulut ngambika macha bup dikarang sida ti udah nyapai pemujur.
Dennis mega ngingatka bala nembiak nadai chara bukai dikena sida bisi pengidup menyana kelimpah ari pelajar.
“Tu pekara nyata. Semua dikedeka kitai nyadi apai indai, pengajar, komuniti enggau ketuai iya nya ungkup kita, rebak nampung pengawa dudi hari, teulihka pemujur jemah.
“Belajarka penemu enggau seruran nampung pelajar pengawa ti nadai pengujung,” ku iya.
Berebak enggau nya, Dennis ngarapka tu deka meransang bala nembiak bukai ransing agi belajar sereta besemekih nyapai pemujur enggau penyulut ba pelajar.
Ku iya, ari sukung tegut enggau pengeram bala pengajar enggau apai indai, SMK Temenggong Datuk Lawai Jau mujur nempa mayuh nembiak ulih dikearap enggau ulih besemekih.
Iya ngarapka kerejasama baka nya seruran ditampung nuju pengawa nempa rebak dudi hari ti bisi pengelandik tinggi, penemu enggau ulih besemekih sereta ulah ti meruan.
Seraya prinsipal sekula, Rechard Emang, ti ngumbai pengawa nya nyadi antara pengerami besai ti udah diatur sekula, madahka sepanjai taun, bala nembiak udah nyapai mayuh pemujur ukai semina ba akademik sida aja, tang mega aktiviti kokurikulum.
“Naka diatu, dalam taun 2017, kitai mujur ngemanahka School Grade Percentage (GPS) ngagai 5.32 ari 5.51 ba taun ti dulu.
Sama bisi datai Chairman Serakup Apai Indai enggau Pengajar (PIBG) Maurice Lawai, Penghulu Anthony Kule, Ketuai Kampung Long San Lucia Paya enggau Pemesai Perubat Klinik Pengerai Long San Dr Chin Yun Khiang.