Dikena meri rega ngagai tanah nya, pengempu tanah Adat Bansa Asal patut bisi perambu ngemansangka tanah nya
BINTULU: Perintah Nengeri Sarawak deka mantu pengempu tanah Adat Bansa Asal ( NCR) ngemansangka tanah sida ngambika nyadi ekonomi berega agi kelebih agi meransang ngemansangka pengawa betupi chara pemadu baru dikena ngulihka penatai pemisi nyengkaum ngerumban pengawa nyukat pala tanah sida.
Kepala Menteri Datuk Patinggi Abang Johari Tun Openg madahka tanah deka nadai mai penguntung enti sema enda diperimba lalu dikena meri rega ngagai tanah nya, pengempu patut bisi beberapa perambu pemansang ba tanah sida.
Nya kebuah ku iya, raban perintah nengeri udah ngubah Kanun Tanah NCR nyengkaum Pemakai Menoa enggau Pulau Galau, ke alai tanah nya patut diberi hak ngempu, enda patut dijual tang mesti diintu orang ti ngintu ngambika bisi rega.
“Aku udah ngerikod pekara ti disebut Alex (Datuk Alexander Nanta Linggi) enggau Douglas (Datuk Amar Douglas Uggah Embas) ti mai reti aku berat deka mutarka pekara dibantai,” ku iya lebuh nimbal resolusyen dibantai rambau pengawa bejadi nutup Simposium Budaya Iban Ke-7 ti digulu 300 penyereta berambaika jaku `Optimizing Our Resources: Leveraging on Digital Economy for Greater Prosperity’ di sebuah restoran di Bintulu Sentral malam kemari.
Ku iya, simposium tu ngundan beberapa pekara ti patut diputarka kitai lalu iya sedia mendingka bemacham isu bekaul enggau komuniti Iban.
Iya madahka langgur penemu senentang pemansang tanah ukai semina siku iya aja tang kesemua ketuai enggau bala bakih dalam kabinet bela beratika pengawa tu enggau tuju sama enti enda engkeman deka dikemetul.
“Kitai inklusif dibida sebedau tu, aku ninga pasal penanggul suntuk tubuh raban ti gawa nyukut tanah NCR, chara mutarka iya kitai nambahka penyampau tubuh sida (raban gawa nyukat).
“Aku ulih meri lebih (agih belanja) dikena bejalaika pengawa nyukat ti ditangguh ngagai Uggah ngambika ulih dirumban. Tu chara iya, kitai patut bisi tambah dikena mutarka pekara bekaul NCR tang aku minta nyaga tanah tu laban enti dijual, pengempu tanah nadai bulih namanama,” ku iya.
Ngelansa pasal awak ekonomi ti dibantai ku iya, ba penemu iya, bejalaika mayuh Projek Transformasyen Menua Pesisir (RTP) aja chukup ba sitak bepilih nengeri enggau agih belanja Kaban Parlimen (MP) enggau Kaban Kunsil Nengeri ( ADUN) dikena bejalaika kereja ari kunteriktor kelas F, C dan D ninting taun ti bisi 72 sitak menua ba pemansang menua pesisir.
“Aku madahka ungkup Lembaga Pembangunan Koridor Wilayah (RECODA) ti ditemu ungkup Samalaju Bintulu enggau Tanjung Manis tang aku udah mansik enggau meri fokus ngagai beberapa sitak menua pesisir ti dibagi tiga mungkur pemansang semua sitak Hulu Rajang, tanah tinggi sitak Baram nyengkaum Bukit Sadok,” ku iya.
Ku iya, pengawa tu dikena ngemansangka infrastruktur pemun bekal ai, bekal kuasa karan enggau jalai alun enggau agih belanja ngagai Hulu Rajang, Baram nyengkaum Bukit Sadok ti kesemua iya RM3 biliun dikena ngubah ekonomi kelebih agi bekaul enggau pemansang tanah ungkup pengawa betanam betupi.
“Orang nanya aku dini bulih duit bebiliun dikena ngemansangka infrastruktur nya, tu nengah belanja minyak enggau gis perintah nengeri bisi hak ba pemansut nya serta ngemaruka undangundang minyak ngujungka serikat ti bejalaika pengawa nyerungkai pemansut nya patut minta lisin permit,” ku iya nambah.
Senentang servis perintah ku iya, pengawa ngambi staf gawa ba serikat bekaul perintah belalauka kelayakan akademik ti meri awak ngagai semua tang enam staf ari bansa Iban beka ditikika pangkat, reti iya niki pangkat enggau ngambi staf gawa ukai belalauka bansa, tang penemu enggau kelayakan.
Ku iya, senentang Kort Bumiputera, kitai deka mansik enggau nyerenih ngambika kort nya profesional agi ba pengawa ngatur kes ari sukut adat ngambi neritka agi adat ba nengeri tu nyengkaum nyangka ngangkatka luyar nyadi akim.
Pekara keenam pasal asil tanah ti nurun rega nanggul raban bumai ku iya, kitai deka mansik dikena nentuka pekara tu diputar lalu raban bumai ulih dibantu.
Berebak enggau nya iya mega madah pasal bantu anak mit baru ada ba taun baru tang apin madahka penyampau dataika pengawa mantaika bajet nengeri kena 5 November tu, ke alai belanja tau dikeluar maya anak mit manggai umur 18 taun sekalika dikena nampung pelajar ngagai universiti tauka nyangka dikena bedagang.
Kelimpah ari nya, iya meransang peraban pupu bansa ba nengeri tu seruran begempung laban perintah nengeri meruan enggau polisi bejalaika pemansang ditu.
“Aku deka madahka diri meretika pekara ti diguna kitai laban pengudah pengawa bepilih tu tadi, aku ngaga pemutus ningkilka diri ari Barisan Nasional (BN) laban semina peranak Sarawak aja ulih ngintu peranak Sarawak.
“Kitai ba Sarawak bisi budaya kitai empu, bisi nengeri nadai simposium baka tu, antara kebuah program tu patut ditampung ngambika bisi timbal lalu kitai ulih ngelangkar polisi, enti enda engkeman, kitai ngemetulka iya tang polisi nya mesti sebaka enggau peminta komuniti,” ku iya seraya nambah, pengelantang idup komuniti ba nengeri tu belalauka ulah pemereti ati enggau pangan diri.
Iya mega bisi mantaika pekara pasal tanggungpengawa nyadi kepala menteri ungkup semua peranak Sarawak lalu nyamin deka nyaga hak serta pemerat semua peranak Sarawak.