Program beripai patut diatur sebulan sekali
SIBU: Peranak rumah panjai dipinta ngatur program beripai abis nadai sebulan sekali.
Chairman Kaunsil Pelilih Menua Pesisir Sibu (MDLBS) Kaunsilor Sempurai Petrus Ngelai madahka tu beguna amat dikena nyeliah sebarang igi penyakit baka denggi enggau rabies.
“Sedarka pekara tu patut diterenak ba semua kitai. Rampa ngelingi ti beresi nyamin idup bepengerai.
“Nya kebuah aku meransang peranak menua pesisir kelebih agi ba rumah panjai ngambika seruran beratka pekara tu,” ku iya lebuh bejaku bejadika Program MDLBS Begulai Enggau Komuniti Rumah Grace Itun, Sungai Salim ditu, malam kemari.
Sama bisi datai Chairman Pengatur Kaunsilor Frederick Taip Ledom, Tuai Rumah Grace sereta bala kaunsilor MDLBS ti bukai.
Sempurai madah naka diatu, gaya igi penyakit denggi enggau rabies ba kandang menua pesisir enda ulih ditagang.
Ku iya, program beripai ukai semina meri pemaik ngagai diri empu aja tang mega ngenegapka tanggam kaul peranak rumah panjai.
Berebak enggau nya, iya meransang bala tuai rumah di baruh pegai MDLBS ngambi mantaika sebarang penanggul bekaul enggau genturung pendiau sida ngagai kaban kaunsil (kaunsilor) MDLBS ti udah dilempaika tanggungpengawa nitihka zon sida empu.
“Tau tanya ngagai kaban kaunsil MDLBS nitihka zon. Beri ngagai sida sebarang tanya ti bekaul ngambika penanggul kita tau dikerandau nengah aum ninting bulan kami,” ku iya madah nyemetak.
Ku iya, MDLBS nengah program komuniti sida deka ngemeratka agi pekara budaya ba pengawa sida ngenyemakka diri enggau peranak menua pesisir.
Iya madahka pekara budaya beguna amat lalu patut dita- mpung genap iku rebak baru dudi hari.
“Taja diatu udah datai ba jeman gajet, tang anang enda ingatka budaya enggau pesaka kitai. MDLBS nengah program komuniti deka seruran ngemeratka pekara tu ba pengawa kitai bejalaika tanggungpengawa ngagai peranak menua pesisir,” ku iya nandu.
Nya alai Sempurai nyamin MDLBS deka berundingka agih belanja sepenyampau RM3,000 dikena ngemanahka agi jelatung Rumah Grace.
Nitih ku iya, enti sema bisi bajet lebih ari MDLBS taun tu, peminta tu deka diberi pemerat.