Isu ditapi komuniti Iban dikearap ulih diputarka perintah nengeri

BINTULU: Simposium Budaya Iban Ke-7 2018 ba Bintulu ti baru udah ditutup mujur ngasilka sekeda resolusyen ti ngayanka isu pemereti ati komuniti Iban patut diputarka perintah nengeri.

Sapit Kepala Menteri Datuk Amar Douglas Uggah Embas madahka isu tu tebilang amat sereta semak ba ati komuniti Iban, taja pia enda melabaka semua isu deka diputarka semalam aja.

“Keterubah iya, kami deka mantaika sukung tegut ngagai nuan, Datuk Patinggi, ngiring Sarawak napi pemar jema baru tu.

“Kami nyukung nuan ngiring Sarawak ba pengawa ngambi pulai hak ti lenyau sereta nyaga keresa iya seraya ngetanka pengelikun enggau pengelantang ba nengeri kitai.

“Kami endang nyukung tegut polisi nuan ari Sarawak terubah. Sarawak mesti diperintah peranak Sarawak,” ku iya.

Komuniti Iban beterima kasih kesemua program pemansang ti udah ngemai pemaik ngagai komuniti.

“Kenyau ari nuan nyilih pangku pengawa nyadi Kepala Menteri dalam bulan Januari 2017, dalam timpuh pandak amat nuan udah mujur nunjukka diri kepala menteri ungkup semua bansa enggau inklusif sereta juluk revolusyen,” ku Uggah lebuh bejadi nutup simposium kena Hari Enam dipenyadi Kepala Menteri Datuk Patinggi Abang Johari Tun Openg.

Kenu ku Uggah, dalam timpuh pandak amat, kepala menteri udah nyapai mayuh pemujur.

Rambau Aum Kunsil Nengeri (DUN) Julai tu tadi, iya madahka kepala menteri nyukung ubah Kanun Tanah ti diatu mujur meri kuasa undang-undang ngagai Pemakai Menoa enggau Pulau Galau sereta tu pekara besai baru ba tanah sereta diterima.

Abang Johari mega ku iya, ngemendarka pengawa meransang transformasyen menua pesisir enggau ngerumban pemansang menua pesisir Sarawak ari agih belanja RM3 biliun ungkup bemacham projek pemansang di baruh Raban Bekuasa Pemansang Hulu Rajang (URDA), Ejensi Pemansang Tanah Tinggi (HDA) enggau Ejensi Pemansang Wilayah Utara (NRDA).

Ku Uggah, kepala menteri mega meransang polisi bebatak asur enggau inklusif ari pengawa numbuhka Unit Pengarap Bukai ( Unifor) dikena mantu raban megai pengarap ukai Islam ngambi ulih ngemeranka pengarap sida enggau likun sereta lantang.

“Kepala menteri udah ngemendarka RM37 juta enggau mulauka tiga ikar taba ba Jalai Ong Tiang Swee (endur besai ba Kuching) endur ngentak begunan ti nyadi indu opis ungkup ejensi.

“Tu sekeda ari chunto udah chukup nyata nunjuk ngagai kitai ke alai kepala menteri mendingka peneka enggau peminta peranak Sarawak, sereta ngamatka iya,” ku iya.

Isu keterubah ti patut diputar ku iya, nambahka penyampau tubuh penyereta ari komuniti Iban ba sektor perintah, ti diatu agi baruh ba penyampau tubuh sereta kunchi pangku pengawa ngatur pengawa.

“Nya kebuah kami ngapil ngagai Datuk Patinggi ke alai penyereta ari Komuniti Iban ba sektor perintah, ambika chunto servis pengatur pengawa, kaunsil kandang menua, raban pemadah, enggau GLC ngambika mayuh agi disengkaum sereta mayuh agi ngayanka komposisyen bansa ba Sarawak,” ku iya.

Ba pekara bukai, penyampau komuniti Iban baruh amat nyereta diri ba pengawa dagang.

Nyadi nengeri ngerembai lalu pelin mayuh agi projek besai pemansang, raban komuniti ku iya deka nyadi sebagi ari pemansang tu nengah pengawa ngaul diri ba awak dagang ti ditempa ari pemansang tu.

“Bisi penangi komuniti Iban ke alai awak kunteriktor Bumi deka dikeruga influx kunteriktor ari luar.

“Kitai minta Datuk Patinggi ngelangkar siti polisi interbensyen dikena meri awak enggau mantu raban kunteriktor tu sereta komuniti dagang kitai,” ku Uggah nambah.

Peranak Sarawak ku iya kaya enggau budaya - enseran enggau keresa sereta gaya sida idup.

Taja pia, diatu enda entu diayan enggau betul lalu bisi dibantai ngagai mensia mayuh ba sebarang bagi pekara Sarawak.

“Nya kebuah kami ngapil ngagai kepala menteri ngambika kubu tuai ba kandang menua ulu diangkat nyadi rumah mijum mit tauka galeri endur mandangka kraf seni bansa asal enggau pesaka bukai ti ngayanka chara idup enggau budaya komuniti Iban.

“Tu deka nambahka pengelain Sarawak ba pupu etnik enggau bemacham budaya ba nengeri tu, ambika chunto, Fort Lily di Betong, Fort Alice di Sri Aman, Fort Brooke di Meluan, Fort Emma di Kanowit enggau Fort Sylvia di Kapit,” ku iya nerang.

Baka nya mega pematut ngerumban pengawa nyukat tanah Adat Bansa Asal (NCR) ungkup komuniti, penanggul ba pekara belanja udah nekul pengawa nya.

Nya alai ku iya, siti ari resolusyen iya nya minta perintah nengeri ngagihka belanja sereta mega ngemendarka mayuh agi orang gawa nyukat tanah NCR dikena ngerumban pengawa nya.