Dagang chara online dikearap ulih ngelakuka produk manik Orang Ulu
MIRI: Seni enggau kraf asal patut diambi nyadi singkang nampung dagang ari pengawa ngelakuka iya nengah ekonomi digital.
Mansutka jaku tu, Kaban Kunsil Nengeri ( ADUN) Telang Usan, Dennis Ngau madahka tu nyengkaum pengawa ngelaku enggau ngasilka kraf jari ti digaga ari manik, ti sinonim enggau berega ngagai komuniti Orang Ulu.
“Manik nyadi sebagi ari idup raban Orang Ulu. Nya alai, enda ulih dikenggai kitai bisi penau diri ba pengawa nempa kraf jari ti ditusuk ari manik.
“Penau asal kitai patut disikap enggau penemu ngelakuka produk kitai chara online. Kitai ulih nempa website enggau mantaika kereja seni kitai dikena ngelakuka iya lalu aku pechaya, ari tu, produk manik kitai deka dikerindu mensia mayuh nyengkaum sida ari bagi dunya bukai,” ku Dennis.
Dennis mansutka jaku tu lebuh bejaku bejadika Bengkel Aksesori Manik dan Keterampilan Diri’ diatur ba Pustaka Miri kena Hari Enam.
Iya meri puji ngagai bala pengatur, Badan Isteri Isteri Ketua Masyarakat Orang Ulu enggau librari ti udah ngatur program besai reti ti meri kelai ngagai komuniti Orang Ulu.
“Program tu beguna amat ngagai kitai ngambika ulih ngelakuka agi penyelai manik Orang Ulu. Tu mega ulih meransang penau diri eng- gau meransang kitai ngalihka kereja seni ngagai dagang untung tinggi, seriris enggau juluk Kepala Menteri kitai deka ngemai pangka ekonomi digital ba Sarawak.
“Tu mega ulih dikemesai ngambika kitai seruran ulih rinduka pengawa asal kitai ti deka ditampung ngagai rebak nembiak kitai,” ku iya nambah.
Workshop udah dibagi ngagai dua segmen diberi nama workshop aksesori manik dikenatai enggau diembing Victoria Mujan, enggau workshop self-esteem dikenataika Sandra Michael.
Batang tuju dikena ngemai kelala enggau bekunsika penemu pasal pengawa nempa kraf jari manik pemun ungkup kena diri tauka tuju dagang besai sereta mega nambahka penemu enggau pengelandik ba pengawa nyaga pemanah gamal sereta nganta nitihka pematut umur bala penyereta.