Sediaka servis komunikasyen ti meruan, rega ti patut Transformasyen nengah teknologi nya nyadi sebengkah chara dikena Sarawak ngubah raban betanam betupi

KUCHING: Pengawa nyendiaka telekomunikasyen ba nengeri tu patut beratka sukut mekal infrastruktur enggau servis ke meruan kelimpah ari rega ti patut ngagai penguna.

Kepala Menteri Datuk Patinggi Abang Johari Tun Openg madah, penyampau rega ti patut deka meri awak ngagai penyendia datai ngagai raban ti ditagit ari sukut servis internet.

“Ambika banding dalam pengeran kitai deka mai transformasyen ngagai palan betanam betupi kitai patut nyambung orang betanam betupi kitai ngena servis internet.

“Nya alai servis nya patut dalam penyampau rega ke patut ungkup orang betanam betupi kitai laban enti nya tinggi sereta ngelui ari pengulih, sida enda ngena teknologi nyadi sebagi ari pemansut,” ku iya. Iya madahka pekara nya lebuh bejaku ba pengerami makai malam Companies (SBC) Retreat ke diatur Serakup Penyedia Infrastruktur Telekomunikasyen Malaysia (PPIT) ti digulu presiden iya Datuk Mohd Rehat Ahmad ditu, malam ensanus.

Bejaku baru abang Johari madahka transformasyen nengah teknologi iya nya sebengkah chara dikena Sarawak ngubah raban betanam betupi.

Sarawak ku iya benasit manah laban rega kuasa ka- ran ti baruh laban nengeri tu mayuh tekad hidroelektrik.

“Enggau pemayuh tekad nya udah tentu ungkus kuasa karan kitai mega baruh lalu mega ungkus internet mega baruh.

“Nyema kitai enda ulih meri tauka nyendiaka rega ke baruh dikena nyambung internet, servis kitai enda datai ba raban ke ditagit,” ku iya.

Berindik ari pekara nya ku iya perintah nengeri nyendiaka ungkup belanja RM1 bilion dikena ngaga enggau ngemanahka kereban teknologi nyengkaum ngaga 600 tiang telekomunikasyen di serata Sarawak taun baru.

Ngenang pekara nya silik agi, Abang Johari madahka ari sukut ekonomi Sarawak enda ulih rari ari bekaul enggau menua luar sereta patut bisi kaul entarabansa.

“Sarawak agi kritikal laban kaul kitai enggau orang luar enda ngemuaska...bisi pan tang enda tentu manah.

“Ketegal nya kitai patut nyerungkai mayuh agi dalam bidang tu ngambika kitai bisi peluang ba kaul entarabansa,” ku iya.

Apin lama Sarawak nengah Sacofa Sdn Bhd udah nempa kerejasama enggau Indonesia dalam sektor bungkur rentayan enggau komunikasyen nya sereta dipelabaka deka nempa kerejasama enggau Brunei udah nya.

Ambika banding dalam pengeran kitai deka mai transformasyen ngagai palan betanam betupi kitai patut nyambung orang betanam betupi kitai ngena servis internet. Datuk Patinggi Abang Johari Tun Openg Kepala Menteri Sarawak