Lina Soo deka ngatur licha bekaul MA63, OMO Sarawak 4 Nov tu

KUCHING: Sejarahwan, Lina Soo deka ngatur licha ba mua mayuh pasal Sempekat Malaysia 1963 (MA63) enggau Ordinan Perlombongan Minyak (OMO) Sarawak ba Sibu kena Hari Minggu ( 4 November) tu berengkah ari pukul 2 lemai ba Hotel Paramount.

Soo deka ngelansa pasal pangka enggau implikasyen OMO ti beguna amat ngagai Sarawak ba peminta ngenegapka ekonomi enggau tikas penegap.

Ku iya madah nyemetak Sarawak meruan nyadi Pengempu Tanah nengah pengawa ngempu sereta megai hak ba minyak enggau gis ti bisi ba Sarawak, kenyau ari sebedau Malaysia ditumbuh.

“Kitai enda ulih nyadi ‘ pengemis’ ba tanah kitai lalu enda patut bebatak asur enggau Petronas pasal OMO ti ngelabuhka hak Sarawak ba pekara minyak enggau gis chara nyata,” ku iya.

Kelimpah ari nya, Soo mega deka ngelansa pasal MA63 enggau Komiti Khas MA63.

Awak tu deka disimpul enggau pengawa betimbal penemu ti ngaul semua penyereta enggau tuju deka ngeripih resolusyen sereta ngayanka juluk peranak Sarawak kering agi, ti deka dibantai ba DUN.

Soo iya nya pengarang dua bup - Sarawak The Real Deal enggau Sarawak Chronicle, belalauka dokumen kolonial British ti diulih ari Arkib Nasional di London.

Sarawak The Real Deal nyerita pasal timbal Sarawak ngagai Perambu Malaysia dalam taun 1960- an, seraya Sarawak Chronicle ngeripih semua dokumen konstituasyen Sarawak ti beguna ari taun 1841 nyentuk 1963.

Kededua bup tu nyadi Sebagi ari Jelajah Buku Sarawak Soo begulai enggau Jerayawara OMO.

Sida ti ngulu licha tu nadai bebayar lalu penerang silik tau telefon nuju Soo ba lumur 014- 5950511.