Sistem Tagang dimunka baru ba Sungai Tisa dikena ngintu sungai menua ulu
KAPIT: Kaban Kunsil Nengeri ( ADUN) Bukit Goram Jefferson Jamit Unyat udah ngamatka semaya diri ngagai peranak Rumah Rolland Bnagau, Sungai Tisa, pati Sungai Ulu Yong ditu ngidupka baru Sistem Tagang nyadi sebuah projek ngintu sungai menua ulu.
Kena Hari Satu tu tadi, Jamit nyempulang Menteri Muda Betanam Betupi Dr Haji Abdul Rahman Bin Haji Ismail ngelancharka Sistem Tagang ba Sungai Tisa.
Bela nyempulang seduai iya nya Penulung Direktor Kanan Pengawa Berikan Menua Ulu Awang Alim Bim Awang Kasim, Pemesai Betanam Betupi Kapit Badin Unor, Pemesai Pengatur Pengawa Opis Pelilih Kapit Bidah Lujah, Tuai Rumah Bina Mathew, Tuai Rumah Lapek, Tuai Rumah Austin Rungga enggau bala bukai.
Ba kenang kena 6 Ogos taun tu tadi, lebuh Jamit ngabas Rumah Rolland Bangau, iya madah ngagai peranak rumah panjai deka ngidupka baru Sistem Tagang ba Sungai Tisa ungkup sida, pengudah pejalai ngabas sungai nya ti diuluka Ketuai Pekara Dagang Besai Opis Menteri Betanam Betupi Moden, Tanah Adat enggau Pemansang Kandang Menua, Dr Gluma Saban, Direktor Opis Dagang Betanam Betupi Perintah Besai (FAMA) Sarawak, Shahid Abu Bakar, Penulung Direktor ( Utai Tanam Komersial) Opis Betanam Betupi Sarawak, Domestic Chunggat enggau Pemesai Betanam Betupi Kapit, Badin Unor.
Tuju pejalai sida lebuh nya ngabas rampa ngelingi enggau eko-sistem sungai sereta kualiti ai.
Sistem Tagang keterubah dilanchar ba Sungai Tisa dalam taun 2004, tang ketegal pengawa ngereja batang ba ulu Sungai Tisa, program tu diketu.
Ke amat, sistem tu mujur pengudah penyampau ikan nambah tang udah nya ketegal pengawa ngereja batang, ai sungai kamah, keruh enggau mayuh apat.
Diatu kereja batang udah ngetu lalu ai udah chiru, nya kebuah Jamit deka ngidupka baru projek ngintu sungai sekali agi ungkup peranak rumah panjai nyadi pemansut protein marin sida.
Sungai Tisa, pati Sun- gai Yong, nangkup semua peminta program ngintu sungai menua ulu laban semina bisi sebuah rumah panjai aja ba sepanjai sungai nya, 39 pintu bilik Rumah Rolland Banggau enggau penyampau tubuh peranak ti mimit.
Kelimpah ari nya, iya diay- ung kampung lalu sepanjai tebing sungai mayuh kayu buah ungkup pemakai ikan.
Jamit mega ngarap deka ngidupka baru program Homestay ba Rumah Rolland nyadi siri ari aktiviti ekonomi ungkup peranak rumah panjai ngulihka penatai pemisi. Ku iya, pekara tu ulih dikereja enggau pemisi sambung jalai, enda baka sebedau tu lebuh peranak rumah panjai semina ulih dilawa nengah pengangkut sungai aja.
Bejaku ba mua peranak rumah panjai, Jamit ngelalau sida meruan begulai enggau Perintah Nengeri di baruh pegai Gabungan Parti Sarawak (GPS).
“Ngelama tu bala kita udha nyadi penyukung tegut bala kami, aku enggau MP Kapit, Datuk Alexander Nanta Linggi. Terima kasih ke sukung nadai bebagi kita. Nya kebuah aku ngapil ngagai sida seruran nyukung GPS di baruh iring Kepala Menteri, Abang Johari.
“Nyadi tulang belakang kami lalu kami deka ulih beratika peminta kita. Aku datai ngamatka semaya diri ngagai kita. Sehari tu, aku enggau Rahman empu datai ngelancharka Sistem Tagang, kelimpah agih belanja ari aku sepenyampau RM75,000 tauka RM5,000 sepintu ungkup 15 pintu bilik dikena nukar perabung baka ti dipinta kita rambau pejalai nemuai bulan Ogos nyin tadi,” ku Jamit.
Ku iya, geran nya iya nya geran perintah datai ari Datuk Alexander Nanta Linggi. Iya mega nangkan peranak rumah panjai seruran bejaga ari raban ti datai nginti sukung ari sida.
“Sida nya semina datai minta sukung tang enda ulih mantu peranak rumah panjai ti begunaka pemansang infrastruktur. Naka diatu, semua pemansang datai ari perintah GPS.”
Jamit ngarika Datuk Alexander Nanta Linggi, nyuaka chek RM75,000 ngagai Tuai Rumah Rolland Bangau.
Iya mega ngemendarka geran MRP bela penyampau RM5,000 ngagai Rumah Rolland Bangau, Rumah Lapik, Rumah Mathew Bina enggau Rumah Austin.