Gempuru likun SARAEXIT dikemendar tang anang ngena leka jaku ‘Keluar Malaysia’
KUCHING: Raban polis udah ngemendarka Gempuru Likun SAREXIT dilanggur kena 4 enggau 5 November tu.
Bejaku ngarika S4S, Chong Shin Hua ti mega Chairman Komiti SAREXIT, madahka sekeda tim pengari S4S udah berandau enggau Ketuai Polis Pelilih Kuching (KPD), Opis Mansik Penyalah Berat (CID), Special Branch (SB) IPD Kuching, Trafik enggau sekeda bala bukai berandauka pekara pasal langgur Gempuru Likun nya.
Ku Chong lebuh ke berandau nya, KPD Kuching nyemetak madah leka jaku gempuru nya ditagang amat, lalu tim sida mega minta bantu ari bala pemesai po- lis, meri kerejasama lalu pia mega raban sida mega deka baka nya, ngambika atur gempuru nya likun enggau meruan.
KPD Kuching nangkan ulah ngena leka jaku ‘Sarawak Exit’ tauka jaku bukai ‘Keluar Malaysia’ enda dikemendar, tang kain rentang bukai nadai ditagang, ku iya.
Ku Chong, bala pesereta ti deka nyereta gempuru nya ditagang ngena sebarang baju parti politik, tambai enggau tanda politik, enggau sebarang pekara ti matak perati politik.
“Enti raban volunteer nyekat sida, lalu bala kaban parti ngaga penyarut, kami deka minta raban polis bejalaika atur ngagai sida,” ku iya.
Taja pia ku iya, bala pesereta mai kain rentang ngundan leka jaku ‘Keluar Malaysia’ maya hari pengawa nyadi, raban polis deka bejalaika pengawa nagang bala pesereta, ku iya.
Naka ke diatu, 60,000 iti stiker SAREXIT udah disadung ngagai mensia mayuh enggau nadai bebayar.
Gempuru likun dua hari berunggu deka diatur berengkah ari 4 November, Hari Minggu, urung pukul 4 lemai nyentuk pukul 6 lemai ba Padang Merdeka, Kuching lalu Bejalai Pagi SAREXIT deka berengkah urung pukul 8 pagi 5 November, ba Square Tower, Waterfront Kuching.