Penusah angus nyadi ba Unit Endoskopi Sepital Miri ketegal sut kabel unit airkon
MIRI: Penusah angus ti nyadi ba Endoskopi Sepital Miri, ditu malam kemari dipelaba bepun ari sut kabel unit airkon.
Pansik tumu pun penusah nya ditukuka Direktor Sepital Miri Dr Jack Wong ba sebengkah penerang berita ti dikeluar kemari.
Ku iya, penusah nya nyadi pengudah ‘alarm’ angus ba bilik jaga bemunyi urung pukul 8.27 malam lebuh bisi asap tebal pansut ari Unit Endoskopi.
“Bala ti gawa berumban nitihka atur ditetap lalu madah ngagai Medical Emergency Call Center (MECC).
“Opis Pengerara Api enggau Penyah Penusah udah dikangau lalu tama ngagai Unit Endoskopi bejalaika pengawa meresa. Nadai orang bebadi ba penusah tu.
“Ari pansik tumu raban bomba, penusah tu dipelaba bepun ari unit airkon,” ku iya ba penerang nya.
Dr Jack madahka bekal kuasa karan ngagai semua begunan udah diputus dikena nentuka pengelikun.
“Operasyen Unit Endoskopi, Unit Electroencephalography (EEG), Unit Pengerai Mensia Mayuh, Unit ‘Perolehan’ enggau Unit Aset dan Stor ti bekunsika opis enggau Unit Endoskopi mega tejanggal operasyen.
“Diatu, Unit Endoskopi enggau Unit EEG udah dipindah enggau bejalaika operasyen ba ruang kereja sementara,” ku iya.
Penerang nya mega bisi nyebut bala pesakit ti bisi semaya deka ditelefon unit bekaul tauka pesakit tau mega betelefon nuju kaunter sementara ba lumur sambung 300 ungkup penerang silik.
Servis bukai ti bisi ba Sepital Miri gawa baka selama.
“Dikena bejaga, kompeni konsesyen udah digerah bejalaika beratika risiko perengkaguna kereban elekterik dikena nentuka tikas pengelikun pesakit enggau staf Sepital Miti seruran dijaga.
“Raban ngatur pengawa Sepital Miri mega meri terima kasih besai ngagai Opis Bomba enggau Penyah Penusah enggau kompeni konsesyen ti udah sikar mutarka penusah nya,” ku Dr Jack.