Program homestay nyaup ngemansutka penatai pemisi ngagai nengeri tu
KANOWIT: Program udah nyadi produk dagang temuai ti beguna amat, udah mantu nengeri tu teulihka sepenyampau RM3.7 juta taun nyin tadi.
Mansutka pekara tu, Direktor Opis Opis Menteri Dagang Temuai, Main Asal enggau Seni ( MOTAC) Sarawak, Suriya Charles Buas madahka bisi 41 kluster di nengeri tu.
“Homestay tu dipejalaika 485 operator ti nyendiaka lebih ari 800 bilik ari baruh program tu.
“Ari Januari nyentuk Oktober taun tu, program homestaykitai udah nerima lebih ari 200,000 temuai ari menua tu enggau menua luar, ti meri asil RM2.5 juta,” ku iya.
Iya bejaku ngagai pengarang berita pengudah muka ‘ Kus Pelasar Homestay ‘ba Rumah Benjamin Angki di Rantau Kemiding ditu apin lama udah.
“Belalauka penambah penyampau tubuh bala temuai ke datai, kitai pechaya deka teulihka RM3.7 juta enti enda lebih agi ari program homestaykitai taun tu,” ku iya.
Kus empat hari berunggu udah digulu 58 iku penyereta ari tujuh menua serata nengeri.
dulu ari nya ba jaku dipansutka iya, Suriya madah ngagai bala penyereta ke alai Rumah Benjamin Angki udah dipilih nyadi endur ngatur kus laban rumah panjai tu nyadi pesereta chunto ari program homestay.
“Program homestay rumah panjai nyadi keterubah di menua tu diaku ` Asean Homestay Standard’,” ku iya nerang.
Suriya nyebut pasal pengelikun, pengelantang enggau pemeresi nyadi tiga pekara beguna amat dikena bejalaika program homestay.