JPBB Sibu udah nentuka 53 buah palan ngenduh maya napi penusah ngenyit
SIBU: Sepenyampau 53 buah palan alai ngenduh udah ditentuka Komiti Mutarka Penusah Ngenyit Sitak (JPBB) Sibu dikena napi penusah ampuh bah tauka penusah ngenyit ke bukai.
Residen Sibu, Charles Siaw madah, tu nyengkaum ba Sibu bisi 27 iti palan, Selangau (semilan) enggau Kanowit (17).
“JPBB mega udah bisi rikod palan ke suah ampuh bah ba sitak tu iya nya di Sibu bisi 179 buah, Selangau ( 61) enggau Kanowit (enam).
“Kelimpah ari nya, penyampau sekula ti suah ampuh bah iya nya Sibu (semilan), Selangau (enam) enggau Kanowit (11),” pia ku iya maya aum media ditu, kemari.
Aum media nya diatur beserimbai enggau pengawa bejadi Bup Direktori Penusah Ngenyit Sitak Sibu 2018.
Charles madah, JPBB tu mungkur tiga Komiti Pengurusan Bencana Renggat Pelilih Menua ( JPBD) Sibu, Kanowit enggau Selangau ti dikeringka 35 bengkah ejensi.
Ku iya, dikena nyendiaka diri napi penusah ampuh bah ujung taun tu, komiti sida ngelempai tanggungpengawa ngagai Opis Pengintu Pengelikun Mensia Mayuh nengah Opis Pelilih Menua begulai enggau ejensi bekaul udah nentu sereta meresa palan alai ngenduh dikena ngambi penerang mensia mayuh.
“Pengawa bukai ke bela diatur baka beberapa enjensi ba komiti tu udah ngaga latih simulasyen, Opis Entali Ai enggau Parit ( DID) semampai matau tikas peninggi ai sereta Opis Kaunsil Sibu enggau Opis Kaunsil Menua Pesisir bela nyediaka kelai tikas peninggi ai ba tiap bengkah jalai ti dipelabaka deka ampuh bah.
“Pia mega, piak sekula ba sitak tu udah numbuhka Komiti Mutarka Penusah Ngenyit renggat sekula dikena ngemu- ntangka pengawa nganjung ripot ba tiap pelilih menua,” ku iya madah baru.
Ba menua pesisir, ku Charles, Opis Pelilih Menua udah nangkan bala Penghulu enggau Tuai Rumah ngambika terus madah ngagai Bilik Gerakkan Bencana renggat pelilih menua nyema bisi penusah ngenyit nyadi.
“Simpul jaku, semua raban JPBB Sibu udah nyikap diri baikka nya ari ‘personel’ enggau logistik sereta ulih datai nyaup nama-nama penusah ngenyit ke bisi nyadi di sitak Sibu.
Bekaul enggau Bup Direktori Penusah Ngenyit Sitak Sibu 2018, Charles madah, bup tu ngundan semua penerang bekaul enggau penusah ngenyit ti bisi nyadi ninting taun.
“Bup tu mega ditengkebang bepun ari peneleba ti udah diasai maya napi penusah ngenyit nyadi taun sebedau tu,” pia ku iya madah.
Ba pekara bukai, mensia mayuh tau meda nengah www. ihydro. did. sarawak. go. my bekaul enggau penerang ai pasang surut dikena nyendiaka diri napi penusah ampuh bah lebih agi sida ke diau ba endur ti baruh.
Penerang ba laman web tu semampai diserinih belama ti mega bisi ngerikod tikas peninggi ai.
Di Sibu bisi antara tujuh ngagai lapan iti stesyen pengemata tikas ai sereta bela bisi sepemanjai sungai Rajang ari Belaga, Kapit, Song ngelawa mengeri Sibu.