Mayuh penguji ditapi nyengkaum isu dagang, pengetan sereta ari sukup undang-undang
SIBU: Pengeransing enggau pengelandik Perbadanan Kemajuan Perusahaan Kayu Sarawak (PUSAKA) tebantai ari pemujur napi macham penguji mai industri kayu nyadika siti ari pelasar pemansang enggau penatai pemisi nengeri.
Menteri Muda Perambu Mengeri, Pengatur Tanah enggau Rampa Menua Datu Len Talif Salleh madah, PUSAKA ke ditumbuh 45 taun ke udah mansang nitihka ubah dunya.
“Isu bekaul enggau kampung sereta industri kayu maya diatu nyadi isu global, kelimpah napi penguji bukai ba renggat antarabansa nyengkaum isu dagang, pengetan sereta bekal ti nitihka undang-undang.
“Sekeda nya isu baka mai chara belalai, nebang kayu nadai pemendar enggau isu pengangat dunya. Aku andal amat deka meda indsutri tu majakka singkang sereta naka ulih nyaup pemansang menua,” pia ku iya madah maya Pengerami Makai Lemai Ke-45 PUSAKA Rengat Sitak Tengah ditu, malam ensana.
Sama bela datai maya tu iya nya Menteri Muda Kaul Korporat Abdullah Saidol, Kaban Kunsil Nengeri ( ADUN) Daro Shafiee Ahmad, Direkter Besai PUSAKA Hashim Bojet sereta bala bukai.
Ba taun 2017 ku iya, penyampau eksport kayu enggau produk kayu Sarawak iya nya RM6.3 billion ti ari penyam- pau nya urung RM46.7 juta produk ‘perabot’.
“Aku mega ngarapka semua industri bekaul enggau kayu sereta ejensi ke bukai ulih bekempit enggau PUSAKA ngangkatka tikas produk kayu kelimpah bejalaika insiatif ngerembaika dagang indsutri kayu ngagai menua luar.
“Industri ‘ perabot’ di Sarawak ai mit sereta baru tang enggau pemujur nengeri Sarawak bejalai pelin transformasyen industri kayu, dia deka ngubah struktur industri nya ti bepanggai ba industri primer enggau tengah ngagai industri tertiary,” ku iya madah.
ADUN Belawai nya mega PUSAKA bela ngetanka mujur ngangkatka industri kayu ngagai tikas tinggi agi.
“Aku pechaya industri kayu kitai ulih besemekih enggau menua mansang kebukai lebih agi ba chara bekenaka teknologi teknikal. Projek kebun dandan besai di Bintulu mega deka nentuka bekal kayu enda suntuk dikena industir.
“Kelimpah ari nya, industri tu mega deka mai penguntung dudi hari seraya kitai ransing ngetanka pengelikun rampa menua,” pia ku iya.