‘An Evening With M.O Couture Sarawak’ deka mantaika fesyen motif pua kumbu
KUCHING: Motif pua kumbu makin nerima sambut dalam industri fesyen menua tu pia mega di tikas antarabansa. Berindik ari nya, dua iku peranak nengeri Sarawak Mizta enggau Otine udah meransang diri pansut enggau gaya baru ti endang deka ngerichahka industri fesyen menua tu.
Enggau tu, Mizta enggau Otine ti nyadi penengkebang M.O Couture ti mega disukung Elite Estetik Medispa deka ngatur pengerami mantaika fesyen ‘ An Evening With M.O Couture Sarawak’ kena 3 November tu ti bepalan ba Hotel UCSI Kuching.
“Program tu berengkah ari pukul 4.30 lemai ti deka mantaika semua pekayan gaya baru ari M.O Couture ungkup orang lelaki enggau indu.
“Nangkan ke nya, deka bisi ‘Cocktail Party’ berengkah ari pukul 7 lemai,” pia ko Mizta lebuh ti dikerandau pengarang berita bedau lama.
Beserimbai enggau nya, mayuh program udah diatur lalu maya nya mega Larissa Ping, peranak Sarawak ti udah menggi gelar Miss World Malaysia sama deka bisi datai sama ngerichah pengerami tu.
Kelimpah ari Larissa, Miss Supranational Malaysia 2018 Sanjna Suri dijangka sama bisi maya nya ila. Karen Libau siku penyanyi ti tebilang di Sarawak deka merindang semua ti bisi datai.
Tikit masuk meda pengerami tu agi dijual ba rega RM70 ( Gold Pass) sereta RM90 (Platinum Pass) lalu ulih dibeli enggau betelefon ngagai Mizta empu ba lumur 013-350 5707 tauka Otine (012-886 4544). Nyadi sponsor besai pengerami tu, Elite Estetik Medispa mega deka meri voucher RM30 ungkup tetiap tikit ti dibeli.