Shamsul puas ati enggau pemansang projek ngaga PILN di Semenggok
KUCHING: Sapit Menteri Industri Besai Datuk Seri Shamsul Iskandar Mohd Akin puas ati enggau pemansang projek ngaga Palan Pemansang enggau Pengerembai Industri Lada Malaysia (PILN) di Semenggok ditu.
Taja pia ku iya bisi sekeda penanggul ba projek ke patut diputar awakka projek nya (PILN) ulih tembu dalam timpuh ke udah ditetapka.
“Enggau 30 peratus pemujur nya, aku ngasaika nya udah ba jalai ti betul. Kitai bisi 30 bulan timpuh endur nembuka projek tu, nya alai kitai deka ngiga jalai mutarka sekeda penanggul projek tu.
“Nya kebuah aku empu datai kitu laban deka mending ke diri ari sida (Opis Lada Malaysia - LLM) sereta ngiga chara pemadu jampat dikena nentuka projek tu ulih tembu taun 2020,” ku iya.
Shamsul mansutka pekara nya dalam aum pengarang berita nyerumba penemuai seraya bejalaika pengawa ngabas PILN di Semenggok ditu, kemari.
Projek ngaga PILN di Semenggok ti beungkus urung RM40 juta, ti ditimpuhka tembu dalam 30 bulan iya nya berengkah 18 ogos 2017 sereta tembu 17 Februari 2020.
Projek nya diatu urung 0.11 peratus dulu ari timpuh ke udah ditetapka.
Ditanya bekaul enggau kebuh beperambu deka betemu enggau Jabatan Kerja Raya (JKR) Sarawak, iya madahka nya bekaul enggau rega projek nya ti deka besai agi enti ngena komponen IBS dibandingkan ngena chara lama.
Nyema nitih chara ti lama ulih ngurangka ungkus belanja projek nya, kitai patut nitihka chara nya, ku iya.
Dulu ari nya Shamsul bisi nemuai seraya bejalaika pengawa ngabas Kilang Pemproses Lada LLM; Pembangunan Standard/Peraturan Makanan Berkautan Lada; Program R&D&I Industri Lada enggau Makmal Pembangunan Produk kelimpah ari diberi licha bekaul enggau LLM ba Indu Opis,LLM kemari.
Ku iya, bepelasarka licha ke diberi ngagai iya bisi siti projek tejanggal iya nya stesyen pemansik tang taja pia gaga ati laban projek nya deka dipejalaika sereta ditembuka enggau lengkas laban nya komponen beguna dalam industri lada.
Penembu stesyen sereta PILN enggau ke bukai nya deka meri sukung ngagai industri lada ba menua kitai, ku iya.
“Aku gaga ati laban opis lada bebendar deka ngemandangka ( industri) Hiliran bekaul enggau lada, lalu baka ke ditemu jenama Sarawak Spice diaku dunya ke nyadi siti modal tauka kapital kitai ngemansangka agi industri hiliran ti jauh agi sereta tambah nilai ngagai industri lada. “Siti agi perambu manah ari opis lada tu iya nya ngaga ubah ngambika opis lada bisi kompeni ke dikeempu opis lada ke lalu dikena bejalaika pengawa dagang.
“Nya entara perambu sida (opis lada) sereta deka dipansik dulu ulih opis menteri. Pekara tu udah lama betangguh nya alai aku ngarapka kitai ulih mutarka enda lama agi iya nya numbuhka anak kompeni ngambika neruska aktiviti dagang lalu udah nya ubah ulih dipejalaika sereta ngemanahka prosedur penerit adat enggau atur opis lada,” ku iya.
Kemari penemuai keterubah Shamsul ngagai Opis Lada malaysia di Kuching pengudah dichirika nyadi sapit menteri kenyau ari bulan Julai 2018.
Objektif penemuai nya dikena nemu nama pekara ke nyadi ba opis lada enggau industri lada lebih agi bekaul enggau proejk pemansang, ku iya.
Nyempulang Shamsul kemari, Ketuai Direktor LLM, Dr Harry Entebang enggau ke bukai.