Kelebih agi raban sida ke besai tuai di kandang menua pesisir dikena ngemunaska orang ti enda nemu macha di menua tu
LUBOK ANTU: Pelajar enda formal ti dikelala Opis Pemansang Komuniti (KEMAS) udah meri peluang ngagai peranak menua pesisir kelebih agi sida ti besai tuai enggau raban nembiak ti tinggal ari pelajar formal dikena ngulihka penemu.
Pemesai KEMAS Bagi Menua Sri Aman Josipah Sabas madah, diatu pelajar enda formal tauka dikumbai Pendidikan Literasi Fungsian (PLF) udah ditumbuh dikena mantu komuniti menua pesisir nguasa penemu 3M iya nya macha, ngira enggau nulis.
“Penemu 3M tu mai reti orang ti nyau besai tuai nadai ngembuan penemu pemun 3M deka diajar bala pengajar ti udah dilatih sida KEMAS dikena mantu raban tu nguasa penemu pemun paling enda pan sida nemu nyepil nama diri empu tauka belajar macha tauka nemu lumur,” ku iya.
Iya madah munyi nya lebuh ti bejaku maya bejadika ‘Majlis Penyampaian Sijil Kelas PLF Versi 2.0’ Pelilih Lubok Antu ti bepalan di Balai Raya Kampung Munggu Jabang, Lubok Antu ditu saritu.
Ku iya, ba taun 1961, Unit Pemansang Komuniti udah numbuhka Kelas Orang Besai Tuai ti mai batang tuju ngemunaska orang ke enda nemu nyepil di Semenanjung Malaysia.
“Ba taun 1970, pengawa tu udah dimunka ba Sabah enggau Sarawak ti ngembuan penyampau orang ke enda nemu nyepil ke tinggi.
“Berindik ari Kelas Orang
Penemu 3M tu mai reti orang ti nyau besai tuai nadai ngembuan penemu pemun 3M deka diajar bala pengajar ti udah dilatih sida KEMAS dikena mantu raban tu nguasa penemu pemun paling enda pan sida nemu nyepil nama diri empu tauka belajar macha tauka nemu lumur. Josipah Sabas Pemesai KEMAS Bagi Menua Sri Aman
Besai Tuai tu, Langkar Program Pedoman TUgasan udah ditumbuhka ti ngembuan batang tuju ke sama iya nya ngemunaska orang ti enda nemu nyepil nengah konsep 3M,” ku iya nandu.
Ku iya, tuju numbuhka kelas nya dikena ngemunaska orang besai tuai tauka raban nembiak ti beumur 15 taun ke atas.
Kelimah ari nya, dikena ngembing sereta ngiri penemu ke ulih dipejalaika enggau terus dalam pengidup sehari hari, ngidupka runding ti ulih beserakup lalu talukka bansa, jalai pengarap enggau menua sereta ngembing enggau meransang ngambika komuniti ulih idup ngatika diri.
Iya nambah, kenyau ari PLF ditumbuhka KEMAS di selampur menua, mayuh udah manndangka asil ti manahiya nya komuniti kitai sebedau tu nadai ngembuan penemu pemun tang diatu sida (pesereta) paling enda pan nemu nulis nama sida empu.
“Asil baka tu ti dikedeka kitai kebendar nya, paing enda sida udah nemu urup tauka nulis nama sida empu. Tu kebendar nya penemu ke paling pun,” ku iya.
Berindik ari nya, ku Josipah nambah, pelajar enda formal baka tu patut diteruska agi jemah ila laban mayuh agi peranak di menua pesisir tauka komuniti menua pesisir agi dalam lis buta urup,” ku iya nambah.
Sama bisi ba program nya Pemesai KEMAS Pelilih Lubok Antu Marinda Stewart Thaim, Ketuai Pesereta PLF Florence Bada sereta ke bukai.
Bisi 88 iku pesereta ari empat buah kelas PLF iya nya ba Merindun, Nanga Kesit, Tabau enggau Wong Panjai udah nerima setipikit enggau perais sida nengah program nya.