51, 405 hektar tanah NCR di Kapit digazet nyadi Rizab Komunal Bumiputera (Betanam Betupi)
KUCHING: Naka 30 September 2018 ba bagi menua Kapit bisi 51, 405 hektar (127,022 ekar) pemesai tanah adat bansa asal (NCR) udah digazet nyadi Rizab Komunal Bumiputera ( Betanam Betupi).
Menteri Muda Perambu Mengeri, Pengatur Tanah enggau Rampa Menua Datu Len Talif Salleh madahka tanah nya disukat sereta digazet di baruh Seksyen 6 Kanun Tanah Negeri.
“Lalu naka 31 Oktober 2018 bisi 26,569 hektar pemesai tanah NCR udah dikemendar sereta disukat lot individu dibaruh NCR Inisiatif Baru ungkup semua bagi menua Kapit.
“Ari penyampau nya, 1,682 hektar pemesai udah tembu disukat ke alai 120 hektar pemesai udah diberi surat pala tanah di baruh seksyen 18 Kanun Tanah Nengeri,” ku iya lebuh nyaut tanya tambah ari Wilson Nyabong Ijang (PRS-Pelagus).
Nyabong nanya bekaul enggau kandang endur ke udah digazet di baruh seksyen 6 nya , berapa pemesai tanah ke udah dikemendar disukat lot indivisu NCR baru sereta penyampau ke udah disukat enggau diberi surat pala tanah individu.
Bejaku baru Len madahka tuju pengawa nyukat tanah dikena ngesahka garis entara kandang endur ti dituntut enggau hak ngempu berapa bidang tanah.
Lalu dikena bejalaika proses nyukat nya enda tau enda nengah proses mansik enggau silik dikena nyeliahka garis entara kandang endur tanah ti dituntut besibil.
‘ Bukti tuntutan’ ku iya dirikod ngena pom ke patut deka ngayanka ‘bukti’ didokumentasi bekaul enggau tanah nya awakka bisi ke lalau jemah ila.
Bejaku baru iya madahka pengawa nyukat tanah chukup beguna sama besai reti enggau pengawa ngenukuka pemisi Hak Adat Bumiputera ti endang betul ba atas tanah nya.
Asil pengawa nyukat nya deka membolehkan surat pala tanah dikeluar ke lalu ulih mutarka mayuh pekara bekaul enggau tanah nyengkaum mutarka laya tauka konflik dua piak ba pengawa nentuka garis entara kandang endur tanah enggau nyengenda pengudah disukat.
“Aku alit ati, bakani sekeda orang bepenemu pengawa nyukat tanah nya tau enda ibuh.
“sedangkan pengawa nyukat tanah enggau pengiktirafan tanah nya nyadi tanah NCR ti endang betul iya nya dua pekara ti bekaul ,” ku iya.