Raban psikologi klinikal di Sarawak patut ditambah, mutar isu pengerai runding

Utusan Borneo (Sarawak) - - Berita Iban - Dikarang Rengenyan Labang

KUCHING: Sarawak bisi peminta guna ti enda tau enda enggau lengkas nambahka penyampau raban psikologi klinikal dikena mutar isu pengerai runding.

Kaban Parlimen Kuching, Dr. Kelvin Yii madahka, nambahka nya bisi peminta ba pegawai perubat ti nerima latih ke chukup dikena ngurus penanggul pengerai runding.

“Semua sepital perintah enggau klinik pengerai di Sarawak nyendiaka servis meresa enggau intervensi dikena mantu sida ti betapi enggau penanggul pengerai runding.

“Bisi peminta guna ti enda tau enda enggau lengkas ba pengawa nambahka penyampau raban psikologi klinikal sereta pegawai perubat mega patut diberi latih ke chukup dikena ngurus isu pengerai runding dalam pengawa nyaga pengerai.

“Ba Sarawak, kitai bisi 19 iku pakar psikiatris ba sepital perintah besai nyengkaum Sepital Besai Sarawak (HUS), Sepital Sentosa, Serian, Sri Aman, Sibu, Bintulu, Kapit, Miri enggau Limbang tang semina dua iku aja kaban psikologi klinikal meri servis ngagai 2.6 juta rayat,” ku iya.

Dr Kelvin mansutka penerang nya lebuh bejaku seraya bejadika Hari Tebuka Sepital Sentosa nyerumba 60 taun udah ditumbuhka ke diatur ba Hospital Sentosa Kuching ditu, kemari.

Iya nganti Sapit Menteri Dagang Dalam Nengeri enggau Pekara Penguna, Chong Chieng Jen bejadika Hari Terbuka Hospital Sentosa Kuching.

Lebuh ti ngenang pasal penyampau rayat ti betapi enggau penanggul runding, ambika chunto ku Dr. Kelvin, ba Sarawak dianggarka 35.8 peratus sereta Sabah 41.9 peratus peranak tauka rayat betapi enggau penanggul nya, lalu tu ukai semina nyadi ba raban bepenatai pemisi baruh.

Bepelasarka statistik ke bisi, ambika chunto, Sarawak 41.9 peratus mungkur sida ti lebih tinggi status sosio-ekonomi dibandingka 30.1 peratus, lalu Sabah 46.7 peratus dibandingka 39.3 peratus. (National Health and Morbidity Survey Report 2015).

“Statistik nya ukai statistik ti ngemegahka kitai tang ngansak kitai ngambika lebih fokus sereta gawa bebendar (mutarka penanggul pengerai runding),” ku iya.

Bejaku baru Dr Kelvin madahka dalam bajet 2019 perintah besai nadai nyengala ngagihn ngagai pengerai runding tang iya deka mai pekara bekaul enggau pengelemi sereta pengurang Sepital Sentosa Kuching ngagai Opis Menteri Pengerai Malaysia.

“Aku deka nentuka iya nya perintah nyadika pengawa nyaga pengerai runding nyadi siti agenda besai.

“Dalam bajet nadai nyentuk nyebut pengerai runding taja pia aku udah bejaku enggau Sapit Menteri pengerai Malaysia Dr Lee Boon Chye, lalu iya udah netapka opis menteri deka ngemeratka sentang pengerai runding.

“Taja pan sepital tu (Sepital Sentosa Kuching) enda disengkaum dalam Langgur Pemansang Malaysia Lumpar Ke-11 tang bisi peminta guna ti lengkas ba pengawa ngemanahka sepital tu, nya kebuah aku minta opis menteri nyengkaumka sepital tu dikemanahka ari segi infrastruktur lalu menteri iya deka beratika pekara tu,” ku iya.

Nyerumba Hari Terbuka nya kemari mayuh macham program diatur nyengkaum pengawa bejual barang pemakai sereta pengawa pemansang ari raban soldadu enggau ejensi bukai ti bekaul.

Sama bisi datai ba pengerami nya kemari Pakar Perunding Psikiatri ti mega Sapit Direktor (Perubat) ke lalu Chairman Ngintu 60 Taun Sepital Sentosa Kuching Dr Rosliwati Md Yusoff; Chairman Mental Health Foundation Sarawak Chapter, Dr Ismail Drahman; Direktor Pusat Jantung Sarawak Dr Asri Rifin enggau Mejar Yunos Yusof ngarika Briged Jeneral Mohd Bustaman Mat Zin, Panglima Briged Ketiga Infantri.

BEJADI: Dr Kelvin nyain plak kelai bejadika Hari Tebuka Sepital Sentosa Kuching nyerumba 60 taun ditumbuhka, seraya diperatika (dua kanan) Rosliwati enggau ke bukai.

Newspapers in Malay

Newspapers from Malaysia

© PressReader. All rights reserved.