Sepital Sentosa meruan manah servis taja umur manggai tikas ‘pinchin’

Utusan Borneo (Sarawak) - - Berita Iban -

KUCHING: Sepital Sentosa Kuching ti manggai 60 taun tetap tegap nyendiaka servis psikiatri ti pemadu manah ngagai rayat Sarawak, taja pan pendiau infrastruktur udah retai.

Sapit Direktor (Perubat) enggau Pakar Perunding Psikiatri ti mangku pengawa Direktor Sepital, Sepital Sentosa Kuching, Dr Rosliwati Md Yusoff madahka taja sepital nya udah retai tang tetap meruan ba staf sepital kelimpah ari ke seruran nyikap diri napi pemar ke nuntung Sepital Sentosa.

“Enti nitihka umur pengereja pengawa opis perintah reti iya (60 taun) udah udah manggai umur pinchin tang Sepital Sentosa Kuching enda kala ngelala reti pinchin.

“Iya (Sepital Sentosa Kuching) tetap besedia meri servis psikiatri ti pemadu manah di Sarawak enggau enda ngira bansa, jalai pengarap, umur, penempa tauka status ekonomi. Semua dikelaluka datai nerima servis psikiatri.

“Pengibuh ngagai pesakit tauka klien sereta ulah bisi tanggungpengawa enggau deka bekerejasama baka diri menyadi nyadi prinsip staf Sepital Sentosa,” ku iya.

Dr. Rosliwati ti mega Chairman pengerami ngintu 60 taun Sepital Sentosa Kuching mansutka pekara nya dalam jaku pengelalu Hari Tebuka Sepital Sentosa Kuching nyerumba 60 taun ditumbuhka, kemari.

Hari terbuka nya dipenyadika Kaban Parlimen Kuching Dr. Kelvin Yii ti ngarika Menteri Muda Dagang Dalam Nengeri enggau Pekara Penguna, Chong Chieng Jen.

Nambahka nya Dr. Rosliwati madahka Ahli Lembaga Pelawat Hospital Sentosa mega mayuh mantu enggau meri inspirasi ngagai pesakit tauka temuai secara lansung kelimpah ari staf sepital.

Bejaku baru Dr. Rosliwati taun tu piak ila udah mujur nyelak Buku Nostalgia bekaul enggau 60 taun sepital nya udah ditumbuhka.

Sejarah Sepital Sentosa berengkah lebuh Unit Psikiatri berengka beoperasi ba Sepital Besai Kuching ba taun 1948. Iya nya sebuah sepital ke bisi maya nya suba.

Ba taun 1953 perambu deka numbuhka sebuah sepital sakit runding ti bisi 338 buah katil udah dipesetuju tang pengawa ngaga sepital nya berengkah taun 1957 di Batu 7, Jalan Penrissen. anggar ungkus ngaga urung RM2.5 juta ke alai RM1.5 juta dipelanja Perintah British.

Pesakit udah nya dipindahka ari blok lama Sepital Besai Sarawak ke sepital tu kena 22 Mei 1958. Sepital tu (Sepital Sentosa) diaku rasmi ti dipenyadika Sir Anthony Abell kena 6 Jun 1958.

Nama asal sepital tu iya nya Hospital Mental Sarawak tang ditukar nama ngagai Sepital Mental kena 1 Ogos 1998 ke dipilih sereta dipadahka Tuan Yang Terutama, Gabenor Sarawak Datuk Patinggi Haji Ahmad Zaidi Adruce Mohd Noor.

“Kitai mujur nyendiaka Buku Nostalgia 60 Tahun Hospital Sentosa ti ngayanka unit ke bisi ba Sepital Sentosa, fungsi unit enggau aktiviti ke dipejalaika,” ku iya seraya madahka rambai jaku dikena ngintu 60 taun udah ditumbuhka iya nya ‘Sayangi Sentosaku’.

Sama bisi datai ba pengerami nya kemari Chairman Mental Health Foundation Sarawak Chapter, Dr Ismail Drahman; Direktor Pusat Jantung Sarawak Dr Asri Rifin enggau Mejar Yunos Yusof ngarika Briged Jeneral Mohd Bustaman Mat Zin, Panglima Briged Ketiga Infantri.

Newspapers in Malay

Newspapers from Malaysia

© PressReader. All rights reserved.