Pengawa bepilih PKR Petra Jaya tejanggal, diinsur ngagai sehari tu

Utusan Borneo (Sarawak) - - / Berita Iban -

KUCHING: Pengawa milih ketuai dalam Parti keadilan Rakyat (PKR) pampang Petra Jaya kemari charut mimit ngujungka pengawa bepilih ba sitak nya tejanggal.

Nitihka perambu asal, pengawa ngundi patut diadu jam 9 pagi 10 November tang ditangguh ngagai sehari tu 11 November.

Chalun Ketuai Pampang Petra Jaya, Iswardy Morni madah sida semina nemu sentang hari ngundi nya udah diubah pagi tadi (kemari).

“Aku enda lantang enggau chara tu alai kitai patut muai undi sehari tu (kemari) tang semina dipadah hari ngundi diinsur ngagai pagi ila (sehari tu),” ku Iswardy.

Berindik enggau nya, iya ngaga ripot polis di Balai Polis Simpang Tiga jam 2 lemai kemari sentang pekara ke nyadi lalu dituju ngagai Komiti Bepilih Besai (JPP) PKR enggau JPP (Sarawak).

Iswardy netapka pengawa ngundi deka diatur ila (seharitu) di Dewan Seri Liny di Jalai Haji Taha ditu.

Ngenang kaul ke sama, pengawa muai undi PKR pampang Bandar Kuching diatur enggau lanchar alai 557 iku kaban parti tau muai undi ke berengkah jam 9 pagi.

Pengawa diatur di Indu Opis PKR di Batu Tiga.

Kelimpah ari nya, pampang Kota Samarahan mega ngadu pengawa ke sama alai kaban parti muai undi di Balai Institut Pematih Industri Kota Samarahan kemari.

TEJANGGAL: Palan muai undi ungkup pampang Petra Jaya sunyi pengudah pengawa muai undi ditangguh ngagai pagi tu.

Newspapers in Malay

Newspapers from Malaysia

© PressReader. All rights reserved.