Perengkaguna tu endang patut di Sebauh laban bisi 13 buah sekula di pelilih nya lalu dipelaba deka tembu ba taun 2020

Utusan Borneo (Sarawak) - - Berita Iban -

BINTULU: Perintah Nengeri Sarawak udah ngemendarka pengawa ngaga stadium mit ba Pelilih Sebauh ti deka berengkah digaga taun baru ( 2019) lalu dipelaba tembu ba taun 2020, pia ku Menteri Bekal Ai enggau Elekterik Menua Pesisir enggau Kaban Kunsil Nengeri (ADUN) Kemena Dato Sri Dr Stephen Rundi Utom.

Ku iya, diatu benung ba renggat ngelangkar pelin ti dipeda nyauka sama enggau Stadium Mini Bintulu.

“Aku beratika perengka guna stadium tu patut laban ba Sebauh bisi 13 buah sekula enggau mensia mayuh mega begunaka perengka guna baka tu bejalaika pengawa lumba enggau ke bukai.

“Aku meri terima kaih ngagai Perintah Sarawak ti meri perengka guna tu lalu kitai benung merambu pemansang Pelilih Sebauh jampat agi, antara iya, ngemansangka infrastruktur ti diguna baka bekal kuasa karan, bekal ai, jalai alun sereta jematan meraka Batang Kemena ngelawa Pasar Sebauh nyentuk Ulu Pandan,” ku iya.

Iya mansutka jaku nya lebuh dirandau pengudah Pengawa Bejadika Pekit Lumba Ninting Taun Kaunsil Lumba Sekula Primari (MSSR) Renggat Ke-15 Pelilih Sebauh 2018 ti diatur SK Labang enggau SK Kuala Kebulu disereta 237 iku nembiak enggau 103 pemesai pekit ari 13 buah sekula primari Pelilih Sebauh ba Stadium Mini Bintulu kemari.

Sama datai Pemesai Pelajar Pelilih Sebauh Tero Bayel, Chairman MSSR Pelilih Sebauh ti nyadi Kepala Pengajar SK Bukit Balai Mangai Tugau, Kepala Pengajar SK Labang ti nyadi Chairman Pengatur I Roslan Rosli enggau Kepala Pengajar SK Kuala Kebulu ti nyadi Chariman Pengatur II Marie Bernadette Michael Inting.

Dr Rundi madahka peminta ngaga jalai ba sitak nya ( Ulu Pandan) mega udah dipejalai tang renggat kedua udah dikemendar perintah sebedau tu, diatu agih belanja udah dibatak pulai Perintah Besai, nya kebuah kitai minta belanja ari Perintah Nengeri ngambika melanja projek ti diguna peranak Ulu Pandan.

“Tu aja infrastruktur `miss- ing link’ ba sitak kitai, tang aku ngarapka penyulut pelajar ba Pelilih Sebauh dikemanah, nya kebuah aku meri sukung tegut ngagai Serakup Apai Indai enggau Pengajar ( PIBG), kepala pengajar, bala pengajar enggau naka ulih taja tu di baruh bidang kuasa Perintah Besai,” ku iya nerang.

Ku iya, ari sukut polisi Perintah Nengeri enda deka nejuka tanggungpengawa tu enggau ngarapka peranak Sarawak ulih ngasaika pelajar enggau belajar ti menyana.

“Kitai udah ngemendarka pengawa ngaga sekula baru SK Ulu Segan Bintulu enggau SK Meludam Betong bekenaka model baru nitihka chara Sarawak, ukai sepeneka ati.

“Pengudah Perintah Besai ulih meda model tu, bepanggai ba sida sekalika ulih tauka enda ngaga sekula baka tu, tang kitai dekaka standard (piawaian tinggi) baka ti digaga Sarawak,”ku iya.

Iya madahka kitai empu ulih meda langkar Sk Ulu Segan ti canggih amat laban ti dipeda kitai diatu sekula repok, tuai ba menua pesisir, balat ngasuh sinu lalu aku nemu kepala pengajar mantaika penanggul tu ngambika diseleti nitihka pematut dikereja kenyau ari suba.

“Kitai ba Sarawak bisi sempekat sebedau tu, ke amat, pekara pelajar bisi bida ari polisi dipejalai ba serata menua pasal nadai tatak Sarawak bekenaka Jaku English nyadi batang jaku tang ba Semenanjung, sida nukar ngena batang Jaku Melayu enggau ke bukai,” ku iya.

Ku iya, pengudah 10 taun kitai ti diau ba menua pesisir kena pangka polisi ti ‘flip flop’ ti suah betukar nitihka isi penemu bala menteri baru dipadu gawa.

Pekara tu ku iya, begunaka tindakan afirmatif (positif) ari Perintah Nengeri lalu aku ngarapka polisi ti ditetap ulih dipejalai ke mua laban mayuh menua baka Singapore enggau ke bukai udah maju, tang kitai agi ba ke lama, jauh tinggal diatu laban kitai kurang pintar nangkup polisi nya, kurikulum sekula ti ulih ngangkatka kitai baka ti dipinta.

Ngelansa pasal pejalai iya ngagai SK Bukit Mawang, iya madahka diri ngulu Lumba Ninting Taun Bukit Mawang ke alai iya dua taun tinggal, lalu taun tu ngena awak meda gaya sekula ti begunaka begunan baru ungkup kelas enggau opis pengajar diseleti.

“Laban tubuh pengajar enggau bala nembiak enda mayuh, nyangka kitai tau ngubah nitihka pematut. Aku mega deka beratika pengawa nyeleti sebaka digaga ba sekula bukai, antara iya, SK Sebungan enggau SK Bukit Mawang sereta bisi sekula ti mega suah dituntung penusah bah, iya nya SK Genaan enggau SK Kebulu.

“Nya alai kitai meseti ngiga baka ni jalai mutarka penanggul tu lalu nadai pilih bukai, sekula tu patut dipindah, kitai deka ngemai pekara ti ngagai Perintah Nengeri taja di baruh pegai Perintah Besai. Kitai beratika agih belanja enda mayuh ungkup Sarawak, iya nya RM4 biliun tang kitai empu (Perintah Sarawak) udah ngemendarka RM11.914 biliun ungkup Sarawak,” ku iya nerang silik.

Ku iya, ba pekara asil ti baru iya nya nengah chukai korporat, komoditi enggau ke bukai, kitai deka bulih asil tambah lalu baka selama, asil diterima kitai RM5.6 nyentuk RM6 biliun enggau tambah RM3.5 biliun, nyangka kitai nerima lebih RM10 biliun, uji perati kandang lima taun kitai ulih ngereja mayuh pengawa.

“Nya kebuah kitai enggau semua peranak nengeri tu patut nyukung perintah nengeri ukai semina nyaga hak nengeri tang asil menua (minyak enggau gis) kitai ti ngelama tu nadai kala diperunding lalu kitai enda ibuh malik ke belakang tang patut mansang ke mua,” ku iya.

Ari nya ku iya, kitai begunaka belanja ari Perintah Besai tang sida madah nadai belanja, nya kebuah semua projek diserah ngagai Perintah Nengeri nyengkaum projek besai ti patut dikemata perintah nengeri.

Aku beratika perengka guna stadium tu patut laban ba Sebauh bisi 13 buah sekula enggau mensia mayuh mega begunaka perengka guna baka tu bejalaika pengawa lumba enggau ke bukai. Dato Sri Dr Stephen Rundi Utom Menteri Bekal Ai enggau Elekterik Menua Pesisir

DR RUNDI

Newspapers in Malay

Newspapers from Malaysia

© PressReader. All rights reserved.